Pavaha niezaležnaha hramadztva ŭrešcie schilicca na bok taho palityka i taje palityčnaje siły, jakaja bolš efektyŭna i kreatyŭna papracuje na arhanizacyju śviata 25 Sakavika. Kamentar Redakcyi.
U paniadziełak 19 lutaha adbyłosia pazačarhovaje pasiedžańnie palitrady abjadnanaj apazycyi. Pryčynaj sklikańnia rady stałasia rašeńnie Alaksandra Milinkieviča nia ŭdzielničać u sakavickim Kanhresie demakratyčnych siłaŭ. Na pasiedžańni prysutničali taksama lidery Rady biełaruskaj intelihiencyi.
Jano ničoha nie źmianiła. Milinkievič zastajecca ćviordym u svaim niežadańni iści na Kanhres. Partyjnyja lidery — u niežadańni padparadkoŭvacca Milinkieviču.
Eks‑kandydat u prezydenty ličyć, što Kanhres nia maje sensu, kali jon źviadziecca da abmierkavańnia ahulnych materyj. Taksama Milinkievič pierakanany, što apazycyja musić mieć lidera z šyrokimi paŭnamoctvami. Apošniaj kroplaj, jakaja spravakavała Milinkieviča na razryŭ z partyjnymi bosami, stała rašeńnie palitrady demakratyčnych siłaŭ pierajści da ratacyjnaha staršynstva i zabaranić Milinkieviču vystupać ad imia ŭsich demakratyčnych siłaŭ biaz sankcyi toj samaj palitrady.
U paniadziełak Milinkieviča choładna ŭhavorvali pryjści na Kanhres, kab jon «chacia b adčytaŭsia ab zroblenaj pracy». Faktyčna ž, udzieł Milinkieviča lehitymizavaŭ pracu Kanhresa ŭ vačoch hramadzkaści i zamiežža. Jak trapna sfarmulavaŭ Vincuk Viačorka, «bieź Milinkieviča nia moža być Kanhresu abjadnanych demakratyčnych siłaŭ». I dadaŭ: «Ale i Milinkievič biez Kanhresu nia lider demakratyčnych siłaŭ».
Delehataŭ na Kanhres na hety raz vyłučali šlacham zboru jak minimum trochsot podpisaŭ vybarcaŭ. U vyniku najbolšaje pradstaŭnictva na Kanhresie buduć mieć levyja partyi na čale z kamunistami. Jany nia majuć absalutnaje bolšaści, ale blakujučy pakiet naležyć pradstaŭnikam AHP, na čale ź nieprychilnym da eks‑kandydata ŭ prezydenty Anatolem Labiedźkam. Tamu Milinkievič razumieje, što hety schod naŭrad ci ŭmacuje jahonaje liderstva.
Kamunisty nastojvajuć na raniejšym časie praviadzieńnia Kanhresu — 17—18 sakavika. Ssylny Statkievič zaklikaŭ pieranieści Kanhres na 2008 hod. Lider Partyi BNF Vincuk Viačorka prapanavaŭ kampramisny varyjant. «Kampramis dziela adzinstva» praduhledžvaje praviadzieńnie Kanhresu ŭ traŭni i abrańnie Milinkieviča staršyniom palityčnaj rady dziela taho, kab jon moh pradstaŭlać apazycyju ŭ zamiežžy.
Krytyki zakidajuć Milinkieviču słabyja arhanizatarskija zdolnaści i biaździejnaść paśla prezydenckich vybaraŭ. Praŭda, tut i sami jany pachvalicca asabliva nia majuć čym.
Treba adznačyć, što kaalicyja kanhresistaŭ piarestaja. U jaje ŭvachodziać lidery palityčnych partyjaŭ — časta ŭ niaprostych adnosinach pamiž saboj, ale jakija nie žadajuć mocnaha lidera nad saboj.
Da ich dałučylisia «palityki‑adzinočki», vycisnutyja na peryferyju hramadzkaj uvahi pa miery ŭzmacnieńnia Milinkieviča j Kazulina. Jany bačać u detranizacyi Milinkieviča šaniec na praciah ułasnaj palityčnaj karjery.
Staršynia Rady biełaruskaj intelihiencyi Ŭładzimier Kołas amal nieprychavana krytykavaŭ dziejańni Milinkieviča: «Ja spadziajusia, što i Alaksandar Milinkievič, jaki inicyjavaŭ hetuju sytuacyju, niešta zrazumieŭ. I z adnaho boku, drenna toje, što zdaryłasia. A z druhoha boku, moža, i treba było niejkija zachady nadta rezkija zrabić. Treba nieści sapraŭdnuju adkaznaść za vyniki tych rašeńniaŭ, jakija prymajucca, tady na novym jakasnym uzroŭni i pojdzie praca. Bo śpisvać usio na režym — heta ŭžo ŭsim nadakučyła, heta ŭžo nie pracuje».
A eks‑palitviazień Siarhiej Skrabiec uvohule paraŭnaŭ Milinkieviča... z Hitleram. Abureńnie palityka vyklikaŭ list Milinkieviča da Łukašenki. Skrabiec ličyć nieprymalnymi pieramovy z kiraŭnikom krainy. «Padałosia, što Hitler pačaŭ razmaŭlać pa‑biełarusku», — zajaviŭ Skrabiec.
Partyjnych lideraŭ horača padtrymali rasiejskaje i kalarasiejskaje kryło apazycyi.
Z krytykaj zajavaŭ Milinkieviča vystupiŭ eks‑kandydat u prezydenty Alaksandar Kazulin: «Ja škaduju, što moj kaleha zrabiŭ u apošnija dni zajavy, jakija pastavili demakratyčnyja siły ŭ niaprostaje stanovišča. Spadziajusia, što realnyja dziejańni Milinkieviča buduć nakiravanyja na dasiahnieńnie zhody ŭ demakratyčnym asiarodździ i dazvolać u bližejšy miesiac arhanizavać losavyznačalny dla Biełarusi nacyjanalny forum — Kanhres abjadnanych demakratyčnych siłaŭ». Treba adznačyć, što toj samy Kazulin minuły «losavyznačalny forum» prosta praihnaravaŭ.
Apantana krytykuje Milinkieviča na sajcie «Biełorusskij partizan» žurnalist Pavał Šaramiet. Jon nazvaŭ Milinkieviča «polskim prajektam» i «bajaźliŭcam».
Na tym ža sajcie byŭ źmieščany artykuł rasiejskaha palitolaha Andreja Suzdalcava «Aktualnyja prablemy schavanaha kanfliktu». Krytykujučy siońniašniuju biełaruskuju ŭładu, Suzdalcaŭ taksama pierajmajecca tym faktam, što Milinkievič admaŭlajecca ŭdzielničać u Kanhresie. Suzdalcaŭ niepakoicca, što biełaruskaja ŭłada i apazycyja zmohuć znajści kropki sudakranańnia ŭ baraćbie suprać rasiejskaje daminacyi. U antypolskim zapale jon idzie dalej za Šaramieta. Jon bačyć polskuju intryhu ŭ samim fakcie niezaležnaści Biełarusi i vyžyvańnia biełaruskaj nacyi. Viaršyniaj publicystyčnaha talentu hetaha aŭtara možna ličyć voś hetuju frazu: «…dabicca svajoj mety Varšava moža tolki poŭnym vyniščeńniem rasiejskaha narodu». Zrešty, fantazija sp.Suzdalcava nie ŭpieršyniu pracuje ŭ hienacydnym kirunku. Letaś hety aŭtar zaklikaŭ departavać z Rasiei biełarusaŭ.
Krytyka z boku prarasiejskich dziejačoŭ maje idejnuju padbiŭku. Z asłableńniem Milinkieviča jany spadziajucca padvažyć jahony palityčny kurs (niedapuščeńnie rasiejskaha ŭmiašańnia ŭ biełaruskuju palityku, padtrymka biełarusizacyi, sajuz z Zachadam). A voś krytyka z boku partyjnych lideraŭ nie vychodzić za miežy asabistaha. Alternatyŭnaj stratehii Kazulin, Kalakin, Labiedźka i Viačorka nie prapanujuć. Tady što daść ratacyja lideraŭ zamiest Milinkieviča niekamu, akramia samich ratavanych lideraŭ?
Milinkievič pačaŭ žorstkuju hulniu na masavaj antypatyi da biespaśpiachovaj dziejnaści palityčnych partyj. Možna spračacca, karektny taki jahony chod ci nie, ale jon spracoŭvaje. Reakcyja čytačoŭ z sajtu «NN» krasamoŭnaja: dzieviać dziasiatych padtrymlivajuć u hetaj sprečcy Milinkieviča.
Mechanizm palitrady kančatkova zdyskredytavaŭ siabie, kali jana tak i nia zdoleła vypracavać reakcyju na naftahazavy kanflikt. Niama sumnievu, što i abmierkavańnie adkrytaha lista da Łukašenki zamarudziłasia b da biaskoncaści, kali b Milinkievič nia ŭziaŭ na siabie adkaznaść i nie padpisaŭ jaho ad siabie asabista. Tym samym zrabiŭšy krok, na jaki ŭłady dahetul nie adkazali. Čytačy sajtu «NN», dzie publika nie z pamiarkoŭnych, amal tryma čverciami hety chod Milinkieviča ŭchvalili (hł. «NN» №5). Siaredni ž vybarščyk‑demakrat, dumajecca, pastaviŭsia da hetaha kroku jašče bolš pazytyŭna.
Na dumku analityka Jana Maksimiuka, unutryapazycyjnaja baraćba vyhladaje niepryhoža. «Ciapier biełaruskaja apazycyja maje šaniec, jakoha nia mieła šmat hadoŭ, — skazaŭ Maksimiuk u efiry radyjo «Svaboda». — U suviazi z novaj palityčnaj sytuacyjaj pamiž Biełaruśsiu i Rasiejaj i ŭ suviazi z tym, što biełaruski prezydent zrabiŭ, prynamsi, namioki na toje, što choča papravić adnosiny z Zachadam. Biełaruskaja apazycyja maje adzin vialiki kozyr, a mienavita toje, što jana mahła b vystupić jak pasiarednik pry naładžvańni takich suviaziaŭ aficyjnaha Miensku z Bruselem. Hety kozyr mohuć vielmi lohka stracić takimi razborkami, jakija pajšli ciapier. Faktyčna idzie zmahańnie za toje, chto maje reprezentavać apazycyju pierad Bruselem».
Unutranyja razborki ŭ apazycyi majuć tym mieniej sensu, što adzinyja jaje spadziavańni tyčacca Dnia Voli. Tolki vuličnyja akcyi mohuć dać niezaležnamu hramadztvu niejkija kozyry ŭ baraćbie za palityčny vybar Biełarusi. Zajavy, što ad masavaści akcyi 25 Sakavika zaležać palityčnyja perspektyvy Milinkieviča, nia majuć anijakaha hruntu pad saboj. Ad jakaści hetaha śviata budzie zaležać nia los taho ci inšaha palityka, a tonus niezaležnaha hramadztva i, kali chočacie, kurs Biełarusi ŭ nastupnym hodzie. Dumajecca, što pavaha niezaležnaha hramadztva ŭrešcie schilicca na bok taho palityka i taje palityčnaje siły, jakaja bolš efektyŭna i kreatyŭna papracuje na arhanizacyju śviata 25 Sakavika.
