Na nastupnym tydni delehacyja biełaruskaj apazycyi maje naviedać Vašynhton. U skład jaje ŭvachodziać Vincuk Viačorka, Siarhiej Kalakin, Anatol Labiedźka, Iryna Kazulina i Siarhiej Mackievič. Spačatku mierkavałasia, što ŭ skład delehacyi ŭvojdzie i Alaksandar Milinkievič, i navat planavałasia sustreča biełarusaŭ z prezydentam ZŠA Džordžam Bušam. Adnak Milinkievič zhody na pajezdku nia daŭ. Tamu, imavierna, i ŭzrovień sustrečaŭ budzie adpaviedna nižejšy.
Aficyjnaje tłumačeńnie z vusnaŭ palityčnaha daradcy Milinkieviča Andreja Kusielčuka: «Nijakich pajezdak da 25 Sakavika nie pavinna być. Milinkievič vyrašyŭ zasiarodzić svaju pracu vyklučna na spravach Biełarusi j padrychtoŭcy da 25 Sakavika. Alaksandar Milinkievič budzie jeździć pa rehijonach».
U kuluarach havorać, što Milinkievič vykazaŭ takim čynam svajo staŭleńnie da ambicyj asobnych siabroŭ delehacyi i dziejnaści ichnych amerykanskich partneraŭ.
Anatol Labiedźka ŭžo vykazaŭ svaju niezadavolenaść u interviju radyjo «Svaboda»: «Mahčyma, Milinkievič pajedzie asobna ŭ inšaj kanfihuracyi, ale vysnova adna — kali dźvie pajezdki, to heta budzie nia toj uzrovień sustrečaŭ. My budziem, moža, druhaja i treciaja delehacyja, havaryć pra Biełaruś, ale značna źniziŭšy mahčymaść, kab hety hołas pra Biełaruś byŭ pačuty. Nia dumaju, što heta kanstruktyŭna».
