Pamianiać vyniki hałasavańnia hledačoŭ na «Jeŭrafeście» rasparadziŭsia pradziusier Dźmitryj Baranaŭ. Ab hetym siońnia na naradzie z udziełam Łukašenki pa vynikach praviadzieńnia finału nacyjanalnaha televizijnaha muzyčnaha prajekta «Jeŭrafest» painfarmavaŭ pieršy namieśnik kiraŭnika Administracyi prezidenta Alaksandr Radźkoŭ, jaki ŭznačalvaŭ śpiecyjalnuju kamisiju.

«Kamisija pa ŭsim łancužku praviała pravierku dla adnaŭleńnia sapraŭdnaj karciny.

Ustanoŭlena, što vyniki hałasavańnia žury sfalsifikavanyja nie byli.
Usie našy apytańni pakazali, što cisku jany nie adčuvali», — prainfarmavaŭ Alaksandr Radźkoŭ. Jon adznačyŭ, što pa vynikach hałasavańnia členaŭ žury na pieršym miescy była hrupa Litesound, na druhim — Alona Łanskaja.

Paśla zakančeńnia pracy žury na praciahu 15 chvilin išło hałasavańnie telehledačoŭ. «Byli adkaznyja asoby, pierš za ŭsio rabotniki Biełteleradyjokampanii, jakija jak sistemnyja administratary adkazvali za padlik hałasoŭ i siadzieli za kampjutarami.

Heta było ŭ pierasoŭnaj telestancyi. Tam prysutničali 7 čałaviek. Chod hałasavańnia abmiarkoŭvaŭsia, byŭ adkryty. Tamu ŭsie bačyli (i heta paćviardžajuć prysutnyja), što pa telefanavańniach hledačoŭ i SMS hrupa Litesound prykładna na 2 tys. abychodziła Alenu Łanskuju, — raspavioŭ Alaksandr Radźkoŭ. — Kali paśla padviadzieńnia vynikaŭ u hetuju stancyju pryjšoŭ pradziusar Dźmitryj Baranaŭ, jamu paviedamili sapraŭdnuju karcinu.

Jon zahadaŭ, kab dali vyniki, u adpaviednaści ź jakimi pieramožcam była b Alona Łanskaja. Hetyja vyniki byli pieradadzienyja ŭ padlikovuju kamisiju i padsumavanyja».

Alaksandr Radźkoŭ dalej rastłumačyŭ, što ŭ Aleny Łanskoj i ŭ hurtu Litesound apynułasia adnolkavaja kolkaść bałaŭ, a pa ŭmovach konkursu ŭ hetaj situacyi pieravaha addajecca tamu, chto atrymaŭ bolš hałasoŭ telehledačoŭ.

Jon taksama raspavioŭ, što rabotniki, jakija znachodzilisia ŭ pierasoŭnaj telestancyi, zachavali na fłeš-karcie sapraŭdnyja dadzienyja. «My pravieryli praź siervier «Biełtelekama». Jany ŭ dakładnaści supadajuć z tym, što było na fłešcy. Heta značyć sapraŭdnaja karcina ŭ nas jość. Pa hetych vynikach pieramahła hrupa Litesound z roźnicaj amal u 2 tys. hałasoŭ.

My dokazna i dakumientalna ŭstanavili, što vyniki hałasavańnia telehledačoŭ byli sfalsifikavanyja», — kanstatavaŭ Alaksandr Radźkoŭ.

Usio heta paviedamlaje ahienctva BiełTA. Jano nie paviedamlaje, adnak, čamu supracoŭniki aparatnaj pasłuchalisia zahadu Baranava.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?