Na siońniašnim pasiedžańni Palityčnaj rady abjadnanych demakratyčnych siłaŭ pastupiła prapanova ad Sajuzu levych partyj (u jaho ŭvachodziać Biełaruskaja partyja žančyn «Nadzieja», Partyja kamunistaŭ biełaruskaja i Biełaruskaja sacyjał‑demakratyčnaja partyja (Hramada)) pravieści čarhovy Kanhres demsiłaŭ 14 i 15 krasavika.
Inšyja ŭdzielniki pasiedžańnia pryznali hetuju datu prymalnaj. Adnak rašeńnie u ramkach Palitrady prymajucca dźviuma tracinami ad 12 subjektaŭ, jakija ŭvachodziać u skład rady, a siońnia na pasiedžańni prysutničali pradstaŭniki tolki 7 subjektaŭ.
Pieršy namieśnik staršyni Biełaruskaj sacyjał‑demakratyčnaj partyi (Hramada) Anatol Laŭkovič havoryć, što inicyjatyva pravieści Kanhres u siaredzinie krasavika sychodzić ad levych partyj. Astatnija ŭdzielniki siońniašniaha pasiedžańnia suprać hetaha terminu nie vystupajuć:
«Siońnia prahučała nastupnaje: jašče dajem adzin tydzień tym udzielnikam rady, chto siońnia nie prysutničaŭ, kab dumali ‑‑ buduć jany ŭdzielničać u kanhresie ci nie. Kali chto nie žadaje, dyk i nie patrebna. Ale praz tydzień my budziem ruchacca ŭ bok Kanhresu i budziem jaho pravodzić».
Anatol Labiedźka ‑‑ staršynia Abjadnanaj hramadzianskaj partyi taksama vystupaje za abaviazkovaje praviadzieńnie Kanhresu:
«Kali nazyvać rečy svaimi imionami, dyk častka subjektaŭ kaalicyi nie zacikaŭlenaja ŭ arhanizacyi dy praviadzieńni Kanhresu. Bolš taho, jany nie razhladajuć Kanhres jak vyšejšy pradstaŭničy i stała dziejučy orhan. Ale taki padychod nie aznačaje, što karavan musić spynicca. My zrabili jašče adzin krok nasustrač kampramisu i kansensusu. Dead‑line nastupaje 15‑ha sakavika. Tyja subjekty, jakija razhladajuć Kanhres jak vyšejšy pradstaŭničy i stała dziejučy orhan, jaki pavinien lehitymizavać pazytyŭnuju alternatyvu dla Biełarusi i jaje hramadzianaŭ, i tyja, chto ličać, što mienavita na hetym forumie pavinny być pryniatyja stratehija i plan dziejańniaŭ, iduć dalej».
Namieśnik staršyni Partyi BNF Viktar Ivaškievič nazyvaje try momanty, jakija musiać papiaredničać praviadzieńniu Kanhresu:
«Pieršy ‑‑ pavinna być skončana praca naziralnaj kamisii, jakaja praviaraje kolkaść podpisaŭ vybarnikaŭ, što sabrali kandydaty ŭ deputaty padčas apošnich miascovych vybaraŭ, kab stać delehatami Kanhresu. Druhi ‑‑ pavinna być rašeńnie ab pašyreńni delehackaha składu. Prynamsi, prapanujecca dałučyć da ich pradstaŭnikoŭ niaŭradavych arhanizacyjaŭ i delehataŭ Kanhresu 2005 hodu. I heta treba jašče ŭzhadnić. I treci ‑‑ pavinny być zaćvierdžanyja prahramnyja dakumenty, jakija buduć ahučvać na Kanhresie. Usia hetaja praca padychodzić da zaviaršeńnia, ale na siońniašni dzień jana nie skončanaja».
Na dumku spadara Ivaškieviča, kali 15 sakavika na čarhovym pasiedžańni Palitrady hetyja try pytańni buduć vyrašanyja, dyk praviadzieńnie Kanhresu demsiłaŭ u siaredzinie krasavika vyhladaje «całkam realnym».