U treciuju niadzielu Vialikaha postu ŭ kaściole śviatych Symona i Aleny a 14.00 hadzinie dla litoŭskamoŭnych katalikoŭ h. Minska adbyłasia śviataja Imša, jakuju celebravaŭ ks. Uładzisłaŭ Zavalniuk, probašč hetaj parafii i dziekan Paŭdniova‑Uschodniaha dekanatu.

Na Imšy prysutničali pradstaŭniki Litoŭskaha pasolstva na čale z nadzvyčajnym i paŭnamocnym pasłom Litvy ŭ Biełarusi Edvinasam Bahdonasam. Naprykancy śviatoj Imšy da prysutnych źviarnuŭsia biskup Antonij Dziamjanka, Apostalski Administratar Minska‑Mahiloŭskaj archidyjacezii. Biskup padziakavaŭ hrupie litoŭskamoŭnych katalikoŭ za ich inicyjatyvu i namahańni pa ŭviadzieńni niadzielnaj śviatoj Imšy ŭ stalicy Biełarusi na ich rodnaj movie. Darečy, užo mnohija hady ŭ vilenskim kaściole śviatoha Bartałamieja dla biełaruskamoŭnych katalikoŭ rehularna adbyvajucca nabaženstvy pa‑biełarusku, jakija celebruje ks. Jan Šutkievič.

Paśla śviatoj Imšy kataliki‑litoŭcy źviarnulisia da biskupa i probašča z prośbaj arhanizavać katechietyčnyja zaniatki dla ichnich dziaciej i moładzi ŭ niadzielnaj škole. Vidavočna, što dla zdavoleńnia patrebaŭ viernikaŭ litoŭskaj nacyjanalnaj mienšaści ŭ archidyjacezii nieabchodny adpaviedny śviatar. Heta cudoŭna razumiejuć i vierniki, i biskup, i ŭžo ŭ bližejšy čas buduć zrobleny namahańni ŭ hetym nakirunku.

U minułym śviatary‑litoŭcy mocna paspryjali pahłybleńniu duchoŭnaści katalikoŭ Minščyny i Mahiloŭščyny, dzie ŭ časy isnavańnia Rečy Paspalitaj u tahačasnaj Smalenskaj dyjacezii (na terytoryi siońniašnich Kryčaŭskaha, Horackaha, Čavuskaha i Škłoŭskaha rajonaŭ) znachodzilisia pasiołki, nasielenyja litoŭcami‑katalikami.

Sabranyja vykazali nadzieju na toje, što raspačataja sprava budzie mieć praciah, a dziakujučy namahańniam zacikaŭlenych asobaŭ nieŭzabavie litoŭskamoŭnyja vierniki buduć mieć nie tolki dušpastyra, ale i katechieta, jaki budzie pravodzić zaniatki relihii ź litoŭskimi dzietkami na ich rodnaj movie.

catholic.by

Fota Andreja Lankieviča

Клас
0
Панылы сорам
0
Ха-ха
0
Ого
0
Сумна
0
Абуральна
0