Uviečary 13 sakavika byli zatrymanyja palityk Viačasłaŭ Siŭčyk i Vincuk Viačorka. Na asnoŭnych mahistralach u stalicy stajali pasty DAI i spyniali praktyčna kožnuju mašynu.

Upravu BNF blakavali ludzi ŭ cyvilnym. Vincuku Viačorku ŭdałosia źjechać dachaty, ale jon byŭ zatrymany la dźviarej ułasnaje kvatery, prykładna a 22-j hadzinie. Jon paśpieŭ tolki pieradać synu Franaku małodšuju dačku Ružanu, jakuju była ź im paśla škoły.

Žonku sp.Viačorki Arynu i jahonych dziaciej čakajuć tryvožnyja dni. Varta nahadać, što tolki tydzień tamu staršynia Arhkamitetu śviatkavańnia Dnia Voli pachavaŭ baćku Ryhora, praz što vymušany byŭ pierarvać svoj vizyt u ZŠA, dzie jon pierabyvaŭ u składzie apazycyjnaj delehacyi.

Siŭčyk byŭ zatrymany dźviuma hadzinami raniej, paśla 20-j, na płoščy Jakuba Kołasa, jon znachodzicca va UUS Savieckaha rajonu.

U centry horadu skroź možna było bačyć niezvyčajnuju kolkaść patruloŭ specnazaŭcaŭ u plamistaj formie. Takoje ŭražańnie, što ich pieraviali na ŭzmocnieny varyjant niasieńnia słužby. Na asnoŭnych mahistralach u stalicy stajać pasty DAI i spyniali praktyčna kožnuju mašynu. Heta nahadvała sakavik minułaha hodu, kali byli pryniatyja nadzvyčajnyja zachady, kab paralizavać raspaŭsiud ulotak.

U kvatery maładafrontaŭca Barysa Hareckaha adbyŭsia pieratrus. Jaho ładzili try supracoŭniki KDB u cyvilnym. Aproč ich u kvatery znachodzilisia paniatyja i brat Barysa Kastuś. Ź jahonych słovaŭ, kadebisty kanfiskavali materyjały, datyčnyja Maładoha Frontu — "faktyčna, lubuju papierku, na jakoj napisana: Małady Front".

Siŭčyka ž i Viačorku zatrymali pa padazreńni ŭ ździajśnieńni drobnaha chulihanstva. Na dumku pravaabaroncaŭ, budzie zroblena sproba zatrymać palitykaŭ da 25 Sakavika.

Nahadajem, što ŭ aŭtorak byli vyklikanyja na dopyt maładafrontaŭcy Nasta Pałažanka i Alaksiej Janušeŭski, jakich pierakvalifikavali pa spravie MF sa śviedak u padazravanych, dopyty moładzievych aktyvistaŭ prajšli va ŭsich rehijonach.

«Ułada baicca 25 Sakavika, — zajaviŭ pra zatrymańni Alaksandar Milinkievič. — Jana nia viedaje, što rabić. Z adnaho boku, joj nia chočacca demanstravać ahresiŭnaść, bo 25-ha — heta test: nia zdaść — pakaža ŭsiamu śvietu niaščyraść svajoj praeŭrapiejskaj rytoryki apošniaha času. A z druhoha boku isnuje hety jaje vialiki strach pierad Dniom Voli». U svaich planach na 25 Sakavika lider demakratyčnych siłaŭ ničoha źmianiać nie źbirajecca.

* * *

Kamentar Redakcyi

Ułady chočuć prademanstravać žaleznuju paśladoŭnaść. «Tak było i tak budzie», jak kazaŭ carski ministar unutranych spravaŭ Makaraŭ paśla Lenskaha rasstrełu.

Patencyjnych lideraŭ manifestacyi zatrymlivajuć preventyŭna, jak heta rabiłasia pierad vybarami letaś. Dobra zahadzia, kab zapałochać patencyjnych udzielnikaŭ. Što, darečy, amal napeŭna aznačaje, što ŭ sam dzień 25-ha, pierad telekamerami, usio budzie jak najcišej.

Maładafrontaŭcaŭ chočuć prymusić spynić dziejnaść. Jany nie skarajucca; ličba kryminalnych spravaŭ pojdzie na dziasiatak. Što taksama stanie histaryčnym precedentam.

Vyjaviłasia patrabavańnie Pralaskoŭskaha vydalić z padručnikaŭ biełaruskaj litaratury nia tolki paasobnych tvorcaŭ, ale sam vyraz «nacyjanalnaje adradžeńnie».

Vylez zakonaprajekt pra achovu infarmacyi, jakim, najchutčej, budzie ŭviedzienaja cenzura Internetu.

Reakcyja Łukašenki na Dzień Voli vyjaŭlaje całkam jaho "niezaležnictva".

Pasłańnie ŭładaŭ: biurakratyčna-siłavaja mašyna budzie pracavać u raniejšym režymie. Supraciŭleńnie biessensoŭnaje. Maštab akcyj pratestu budziem źmianšać ad razu da razu paśladoŭnymi preventyŭnymi mierami.

Śviet prainterpretuje aryšty inakš: u Łukašenki zdali nervy, jon baicca manifestacyj, jon adrakajecca zachodniaha vektaru, jon zarablaje rasiejski kredyt, karotkaja palityčnaja adliha skončyłasia; adnak apazycyja nie skarajecca i navat — maładafrontaŭcy — prajaŭlaje hieraizm.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?