Data Kanhresu nie pryznačanaja. Vincuk Viačorka byŭ adzinym, chto hałasavaŭ i za prajekt Milinkieviča, i za prajekt Kalakina.
U Miensku siońnia prajšło čarhovaje pasiedžańnie Palitrady Abjadnanych demakratyčnych siłaŭ. Pravodziŭ pasiedžańnie Alaksandar Milinkievič. Hałoŭnym punktam abmierkavańnia Palitrady była data praviadzieńnia Kanhresu demakratyčnych siłaŭ. Pierad hałasavańniem prachodzili aktyŭnyja i vielmi emacyjnyja debaty.
Prafesar Jury Chadyka zajaviŭ, što data Kanhresu musić być nazvanaja, jak maha chutčej, bo Palitrada pačynaje hublać upłyŭ nia tolki ŭnutry krainy, ale i ŭ zamiežžy. Chadyka pryvioŭ u prykład vizyt Uty Capf, jakaja siońnia pravodzić seminary dla pradstaŭnikoŭ ułady.
Pieršym na hałasavańnie byŭ vyniesieny prajekt Alaksandra Milinkieviča, jaki hruntavaŭsia na prapanavanym Vincukom Viačorkam dakumencie «Kampramis dziela adzinstva». Hety prajekt praduhledžvaje praviadzieńnie Kanhresu i padrychtoŭku da jaho, ale nie nazyvaje jaje kankretnyja daty. Jana musić być vyznačanaja paśla dasiahnieńnia pahadžalnaj kamisijaj kansensusu pa składzie delehataŭ i paradku dnia. «Za» prahałasavała vosiem čałaviek, «suprać» – čatyry, adzin ustrymaŭsia.
Užo paśla hetaha sa svaim prajektam vystupiŭ staršynia PKB Siarhiej Kalakin. Pryncypova jon ničym nie adroźnivaŭsia ad prajekta Milinkieviča, aproč taho, što nazyvaŭ kankretnyja daty praviadzieńnia Kanhresu – 21‑22 krasavika. Kalakin paprasiŭ dziesiać chvilin, kab parazmaŭlać ź lideram Partyi BNF Vincukom Viačorkam. Hałasavańnie dało nastupnyja vyniki: «za» – 6 čałaviek, suprać – 7.
Varta adznačyć, što ŭ hałasavańniach braŭ udzieł namieśnik staršyni BSDP (H) Anatol Laŭkovič, jaki prahałasavaŭ «za», choć BSDP (H) pa siońnia jašče aficyjna nie dałučyłasia da Palitrady. Vincuk Viačorka byŭ adzinym, chto prahałasavaŭ za dva prajekty.
Siarhiej Kalakin, zrazumieŭšy, što jaho prapanovy nie prachodziać, zajaviŭ, što ŭžo bližejšym časam moža vyjści ź liku siabroŭ Palitrady, a Kanhres moža być praviedzieny i z tymi subjektami Palitrady, jakija majuć žadańnie pryniać u im udzieł. Užo paśla pasiedžańnia Kalakin pryznaŭsia, što ŭ toj momant u jaho było vialikaje žadańnie syści z pasiedžańnia.
Nazaŭtra Kalakin ź Labiedźkam zaplanavali praviadzieńnie sustrečy prychilnikaŭ praviadzieńnia Kanhresu 21‑22 krasavika. Jana projdzie a 12:30 na ofisie AHP. Milinkievič u svaju čarhu adrazu pa skančeńni pracy Palitrady nakiravaŭsia ŭ Barysaŭ. Tam jon źbirajecca padtrymać siabru Partyi BNF Anatola Askierku, jaki praz sud źbirajecca abskardžvać niezakonnaje zvalnieńnie z pracy.
