Z sakavika
Dzianisu Dzianisavu pahražaje da troch hadoŭ źniavoleńnia
Aktyvistu niezarehistravanaj arhanizacyi «Bunt» Dzianisu Dzianisavu pahražaje da troch hadoŭ pazbaŭleńnia voli. Sa słovaŭ Dzianisavaha advakata Piotry Kavalenki, chłopca vinavaciać pavodle art.342 (arhanizacyja masavych biesparadkaŭ, što parušajuć hramadzki paradak).
Advakat kaža, što padziei, jakija fihurujuć u spravie Dzianisava, adbylisia 18 červienia 2006 h. u Viciebsku. Tady hrupa moładzievych aktyvistaŭ ź niezarehistravanaj arhanizacyi «Bunt» sprabavała pravieści apazycyjnuju akcyju. Aktyvisty vyviesili bieł‑čyrvona‑bieły ściah.
Kryminalnuju spravu z nahody ŭdziełu Dzianisava ŭ hetym epizodzie zaviali letaś u kastryčniku. A zatrymali Dzianisa 16 lutaha ŭ ciahniku, što jechaŭ u Homiel. Spačatku aktyvista trymali ŭ Homielskim śledčym izalatary, potym pieravieźli ŭ Viciebski śledčy izalatar №2.
5 sakavika
Biaz prava na amnistyju
Administracyja škłoŭskaj turmy vyniesła palitviaźniu Źmitru Daškieviču čaćviortaje papiaredžańnie. Hetym razam — za toje, što jon čytaŭ paśla adboju. Pra heta stała viadoma ź lista Źmitra da baćkoŭ. Pavodle zakanadaŭstva heta aznačaje, što ŭ Daškieviča niama šancaŭ vyjści na volu paśla abviaščeńnia amnistyi. Ciapier jon ličycca złosnym parušalnikam turemnaha režymu, jaki nia staŭ na šlach vypraŭleńnia.
Za kratami małady čałaviek užo šeść miesiacaŭ.
6 sakavika
Levyja sudziacca ź Minjustam
Padčas pasiedžańnia Centralnaj rady Sajuzu levych partyjaŭ, u jaki ŭvachodziać Biełaruskaja partyja žančyn «Nadzieja», Partyja kamunistaŭ biełaruskaja i Biełaruskaja sacyjał‑demakratyčnaja partyja (Hramada), pradstaŭniki partyjaŭ vyrašyli źviarnucca ŭ Viarchoŭny sud Biełarusi sa skarhaj na Ministerstva justycyi za admovu ŭ rehistracyi Sajuzu.
Minjust vinavacić levych u tym, što tyja ładzili ŭstanoŭčy schod novaj arhanizacyi va Ŭkrainie, a nie na terytoryi Biełarusi.
Akramia taho, kožnaja z troch partyjaŭ atrymała aficyjnaje papiaredžańnie za ŭdzieł va ŭstanoŭčym schodzie. Pieršymi abskardzili hetaje rašeńnie kamunisty.
7 sakavika
Kazulinu skasavali admysłovy režym vychadu z haładoŭki
Advakat Ihar Rynkievič sustreŭsia 7 sakavika sa svaim padabaronnym, eks‑kandydatam na prezydenta Alaksandram Kazulinym u viciebskaj kalonii №3. Sa słovaŭ advakata, režym vychadu z haładoŭki palitviaźniu skasavali. A.Kazulina, pavodle Rynkieviča, pieraviali na dyjetcharčavańnie. U suviazi z hetym administracyja kalonii zabaraniła pieradavać jamu pradukty ad svajakoŭ. Palitviazień vyzvaleny ad pracy, a ŭ astatnim dla jaho nijakich abmiežavańniaŭ niama. Jon abaviazany naviedvać usie ŭnutranyja mierapryjemstvy.
Mienčuki patrabavali vyzvalić palitviaźniaŭ
Kala sotni čałaviek uziali ŭdzieł u akcyi, jakaja prajšła 7 sakavika ŭ centry horadu. Jaje ŭdzielniki patrabavali skasavańnia «palityčnych» artykułaŭ Kryminalnaha kodeksu i vyzvaleńnia ludziej, asudžanych pavodle hetych artykułaŭ. Ludzi sabralisia na rahu vulic Haradzki Vał i Niamiha i prajšli šeściem da turmy na vulicy Vaładarskaha.
Ruki ŭdzielniki akcyi trymali za hałavoj, a na vopratcy nieśli šyldy z numarami artykułaŭ, pavodle jakich asudžanyja viadomyja biełaruskija palityki, hramadzkija dziejačy i pravaabaroncy. Kali kalona dajšła da turmy, šyldy byli kinutyja ŭ vohnišča, adnačasova ŭdzielniki akcyi razharnuli raściažku «Svabodu palitviaźniam!» U časie akcyi nikoha nie zatrymali.
8 sakavika
Niepaŭnaletniaha Antona Levanieŭskaha zatrymali za ŭlotki
14‑hadovaha Antona Levanieŭskaha zatrymali na haradzienskim rynku «Paŭdniovy» z ulotkami. Jaho pratrymali kala 2 hadzinaŭ u Kastryčnickim RUUS. Pratakoł milicyjanty nia stali składać, a ad tłumačeńniaŭ Anton Levanieŭski admoviŭsia.
12 sakavika
Pa darozie na mitynh zatrymali lideraŭ pradprymalnikaŭ
Lidery Strajkamu pradprymalnikaŭ Valery Levanieŭski i Alaksandar Vasiljeŭ byli zatrymanyja pa darozie ŭ Miensk, dzie musili ŭdzielničać u mitynhu pradprymalnikaŭ. Zatrymali ich supracoŭniki DAI padčas vyjezdu z Horadni. Milicyjanty zajavili, što aŭtamabil Levanieŭskaha kradzieny. U Haradzienskim RUUSie ich trymali try hadziny.
Mikraaŭtobus zastaŭsia ŭ milicyi dla pravierki, a Vasiljeŭ i Levanieŭski musili ŭziać taksoŭku, kab viarnucca damoŭ. Valeryju Levanieŭskamu nie viarnuli jahonych rečaŭ, jakija byli ŭ mikraaŭtobusie, u pryvatnaści, dyktafon, ličbavy fotaaparat, benzinavy hieneratar.
Na Nastu Pałažanku i Alaksieja Janušeŭskaha zaviedzienaja kryminalnaja sprava
Jany prachodziać u spravie niezarehistravanaha «Maładoha frontu» (Korbana i Chviedaruka) u jakaści padazravanych. Im taksama zakidajuć art.193‑1 (udzieł u niezarehistravanaj arhanizacyi).
Pałažanka źviazvaje pierakvalifikacyju jaje sa śviedki ŭ padazravanuju z ahulnym ciskam na moładź pierad 25 Sakavika. Dziaŭčyna admoviłasia ad pasłuhaŭ pryznačanaha joj advakata i samastojna adšukała abaroncu.
Šachcioram nie dajuć pratestavać
Salihorski harvykankam zabaraniŭ niezaležnamu prafsajuzu pracaŭnikoŭ RUP «Biełaruśkalij» praviadzieńnie pikietu 14 sakavika. Farmalnaja nahoda dla zabarony — epidemija hrypu. U najbližejšy čas harniaki źbirajucca padavać novuju zajaŭku.
Padčas zaplanavanych na 14 sakavika akcyj udzielniki mierkavali ŭźniać pytańni padvyšeńnia kaeficyjentu apłaty pracy pracaŭnikam abahačalnych fabrykaŭ, a taksama vyrašeńnia žyllovych prablemaŭ pracaŭnikoŭ pradpryjemstva.
U Salihorsku praciahvaje pracu specyjalnaja kamisija, jakaja vyśviatlaje pryčynu hibieli šachtara Mikałaja Kisiala, što zahinuŭ 19 lutaha ŭ vyniku abvału ŭ šachcie. U składzie kamisii pracujuć pradstaŭniki prafsajuzu i administracyi pradpryjemstva, supracoŭniki pravaachoŭnych orhanaŭ i MNS.
Ambasadarka ZŠA dy Źmicier Bartosik u haściach u Mikoły Statkieviča
Palitviaźnia Mikołu Statkieviča, jaki adbyvaje pakarańnie na «chimii» ŭ vioscy Błoń Puchavickaha rajonu za arhanizacyju demanstracyjaŭ pratestu suprać falsyfikacyi vynikaŭ vybaraŭ i referendumu 2004 h., naviedała ambasadarka ZŠA Karen Stjuart. Heta pieršy vizyt kiraŭnika amerykanskaj ambasady da Mikoły Statkieviča. Raniej niekalki razoŭ jaho naviedvali ambasadary Niamieččyny, Švecyi, Čechii, Słavakii, a taksama kiraŭnik misii ABSE Okie Petersan. Razmova sp.Statkieviča z ambasadarkaj praciahvałasia kala dźviuch hadzinaŭ.
Raniej, 7 sakavika, palitviaźnia naviedaŭ bard Źmicier Bartosik, jaki zładziŭ dla Mikoły Statkieviča i nasielnikaŭ internatu impravizavany kancert.
Haradzienskija pamiežniki iznoŭ cikaviacca «kalinoŭcami»
Na čyhunačnym vakzale ŭ Horadni pamiežniki pierapisali dadzienyja studentaŭ, što navučajucca ŭ Polščy na prahramie imia Kastusia Kalinoŭskaha. Heta adbyłosia pierad adpraŭleńniem polskaj elektryčki. Pamiežniki pierapisali dadzienyja sa studenckaha biletu Jaŭhiena Skrabutana. Zatym zabrali jahonyja kvitok i pašpart, ale pa niejkim časie dakumenty chłopcu viarnuli. Haradzienskija pamiežniki taksama zacikavilisia studenckimi paśviedčańniami jašče dvuch «kalinoŭcaŭ», jakija prachodzili kantrol raniej za Skrabutana.
13 sakavika
Pieratrus u Hareckaha
Poŭna ŭviečary śledčaja hrupa praviała pieratrusy na kvaterach pres‑sakratara niezarehistravanaha «Maładoha frontu» Barysa Hareckaha i jahonaj maci. Ckanfiskavanyja papiery i systemny blok bratavaha kamputara.
Dopyty ŭ Horadni
Supracoŭniki haradzienskaha KDB naviedali navučalnyja ŭstanovy. Ź niepaŭnaletnimi Volhaj Smalančuk, Jaŭhienijaj Šaścierakovaj dy Volhaj Hałubiec jany razmaŭlali ŭ škołach. Z Chryścinaj Marčuk i dziaŭčynaj, čyjo imia nie paviedamlajecca, — u dekanacie fiłfaku ŭniversytetu. Dziaŭčatam paviedamili, što ich imiony byli ŭ skanfiskavanym padčas pieratrus na kvatery Nasty Pałažanki śpisie.
i ŭ Mahilovie
Na dopyty ŭ miascovy KDB vyklikali siem čałaviek. Śledčych Hrybajłu, Iščynku dy Kurpačenku cikaviła toje ž, što i ich haradzienskich kalehaŭ: abłasnyja dy staličnyja struktury «MF», chto kiruje arhanizacyjami, jakoje dačynieńnie da arhanizacyi maje dapytany. Antona Uścimčuka, Tacianu Bułanavu, Maksima Azarava i niepaŭnaletniaha Raścisłava Pankratava dapytvali ŭ jakaści śviedak pa spravie «dziejnaści ad imia niezarehistravanaj arhanizacyi». Z mahiloŭskaj speckamendatury ŭ abłasny KDB vyklikali na dopyt Artura Fińkieviča, jaki adbyvaje pakarańnie za palityčnaje hrafici. Dniom raniej byŭ dapytany Kiryła Paražynski. Kryścina Šacikava čakaje vykliku na dopyt.
Dopyt mastoŭskaha deputata
U Mastach u jakaści śviedki dapytali deputata miascovaha rajonnaha savietu Źmitra Kuchleja. Dziela hetaha z Vaŭkavysku admysłova pryjechaŭ major KDB Vasil Barysik, jakoha cikavili pytańni, datyčnyja Korbana i Chviedaruka, dy ahulnaja infarmacyja pra dziejnaść arhanizacyi.
U Žłobinie
Miascovyja KDBisty i dapytali byłoha maładafrontaŭca Eduarda Zielankova. Dopytam kiravaŭ homielski supracoŭnik KDB, jaki spasyłaŭsia na zahad sa stalicy. Byli dapytanyja i niekalki aktyvistaŭ arhanizacyi, u t.ł. niepaŭnaletni Kirył Atamančyk, jaki na dopyt źjaviŭsia razam z baćkam.
14 sakavika
Jašče adna kryminalnaja sprava
Znachodziačysia na dopycie ŭ haradzkoj prakuratury pres‑sakratar niezarehistravanaha «Maładoha frontu» Barys Harecki daviedaŭsia ad śledčaha Siarhieja Hrachoŭskaha, što staŭsia padazravanym u spravie «Maładoha frontu». U suviazi z hetaj kryminalnaj spravaj, śledčy dapytaŭ taksama Źmitra Chviedaruka, Ludmiłu Atakołavu, Viktara Jančareviča
Viciebskija hutarki
U Viciebskuju abłasnuju ŭpravu KDB vyklikali na hutarku studenta Andreja Danileŭskaha. Zadali ŭsiaho dva pytańni: što jamu viadoma pra «Małady front» i ci maje jon dačynieńnie da jaho dziejnaści.
U ŭ navučenki viciebskaha liceju №1 Aleny Bahdanavaj supracoŭniki KDB pytalisia pra toje, kolki płaciać siabroŭskich unioskaŭ u «Maładym froncie», ci viedaje jana lideraŭ abo šarahoŭcaŭ arhanizacyi, čamu jejnyja telefony zafiksavanyja jak kantakty ź viciebskimi «maładafrontaŭcami».
U Viciebsku dapytali i adzinaccaciklaśnika viciebskaj himnazii №1 Ŭładzisłava, studentku Juliju Matusievič, a ŭ aršanskim haradździele KDB hutaryli z aktyvistam Iharam Kaźmiarčakom.
