Jury Nieściarenka. Śviata vialikich daždžoŭ. Kovčieh, 2007.
Pieršy biełaruskamoŭny albom veterana mahiloŭskaha roku, jaki žyvie ŭ Białyničach. Za dva dziasiatki hadoŭ u rok‑n‑role hety čałaviek nia straciŭ nadziei, nie zhubiŭ ciarplivaści, nia śpiŭsia. Raniej «Nie stary bend» i jašče adzin prajekt Nieściarenki «White Night Blues» hrali bluzavyja standarty i piesieńki ŭ žanry «ruski rok». Ale hadoŭ užo siem jak białynicki bluzmen niby pračnuŭsia — pačaŭ ładzić u nievialikim haradku rok‑kancerty, litaraturnyja viečaryny i ŭziaŭsia za zapis svajho biełaruskamoŭnaha albomu.
«Śviata vialikich daždžoŭ» — heta toje, što nazyvajuć muzykaj, zroblenaj ad dušy i dla dušy. Nieściarenka — prychilnik staroha dobraha hitarnaha roku a‑la Hery Mur i Ŭładzimier Kuźmin. Takoha kštałtu muzyka, tolki pieraniesienaja na biełaruskuju hlebu, i hučyć na dysku.
Teksty dla albomu Jury pisaŭ sam, sioje‑toje ŭziaŭ ź pierakładaŭ Balasłava Leśmiana, mahiloŭskich paetaŭ i navat Ludmiły Rubleŭskaj.
Z maleńkich cudaŭ albomu — adnajmiennaja naźvie płyty — «Śviata...» — 8‑chvilinnaja balada, u jakuju ŭkładajecca ŭvieś unutrany śviet muzyki. Vydatny biełaruski bluz — «Znaju stolki piaščotaŭ» i duet z Varaškievičam — «Bluz biełaj nočy», jaki kali‑niebudź stanie himnam Białyničaŭ, jakija miascovyja intelektuały nazyvajuć White Night City.
Jość tut admysłovy bonus‑blok — para tvoraŭ z saŭndtreku da spektaklu «Pieśni vaŭka» sa spraviadlivaj pretenzijaj na žanr «rok‑opera».
Varta zaznačyć, što ŭ zapisie paŭdzielničali takija znanyja asoby, jak Aleh Chamienka («Pałac»), Ihar Varaškievič i Siarhiej Truchanovič («Krama»), Kastuś Kancavy («Osimira»). Dla tych, chto lubić muzyku.
