Dla sapraŭdy kamfortnaha pražyvańnia siamji z čatyroch čałaviek treba choć by čatyry pakoi. A heta ŭžo kvatera na 90 kvadratnych mietraŭ. U šmatkvaternym domie na ŭskrainie takaja kaštuje kala 90 tysiač dalaraŭ. Suma niemaleńkaja. A za jaje atrymlivaješ u nahruzku nie zaŭsiody pryjemnych susiedziaŭ, adsutnaść parkoŭki, haradski smoh. Što charakterna — kali hetyja hrošy ŭkłaści ŭ budaŭnictva pryvatnaha doma, kamfortu atrymaješ značna bolš.

Draŭlany dom

Dreva — samy ekałahičny materyjał, a toŭsty brus — jašče i značna bolš ciopły, čym cehła. Samy tanny varyjant pabudovy draŭlanaha doma — kupić hatovy zrub i pieravieźci. Adšukać davoli novy i jakasny možna ŭ dalokaj vioscy za 3–5 tysiač dalaraŭ, z razborkaj-pieravozkaj-zborkaj jon abydziecca ŭ 8 tysiač. Plus padmurak — ad 5 tysiač, dach (znoŭ-taki kala 5 tysiač), plus praviadzieńnie kamunikacyj unutry (tolki elektryčnaja razvodka abydziecca ŭ 600 dalaraŭ — kali ŭsio rabić pravilna). Układvać treba budzie ŭ azdableńnie, prybudovy. Ź minusaŭ takoj pabudovy — ahulnyja płoščy viaskovych zrubaŭ: 50 — 70 kvadrataŭ. A tamu takija damy, choć i abychodziacca ŭ vyniku prykładna ŭ 40 tysiač, u jakaści žylla dla siamji pavyšanym popytam nie karystajucca.

Jašče adzin varyjant — zamović draŭlany dom pad kluč. My nahledzieli prajekt chaty z dychtoŭnaha acylindravanaha brusa, ahulnaj płoščaj 130 kvadratnych mietraŭ. Dach — mietaładachoŭka. Kampanija-vytvorca zapeŭniła, što zdać hety dom pad kluč (heta značyć staŭ meblu, techniku i zasialajsia) jana voźmiecca za 60 tysiač dalaraŭ. Ale śpiecyjalisty kampanii ŭdakładnili, što asobna daviadziecca płacić za padviadzieńnie kamunikacyj i sistemu aciapleńnia. A tolki aciapleńnie, u zaležnaści ad kanstrukcyi, vyciahnie ad 8 da 15 tysiač dalaraŭ.

— Heta značyć, 130 kvadratnych mietraŭ u vyniku abyducca ŭ 70–80 tysiač dalaraŭ? — pasprabavali my ŭdakładnić.

— Bolš dakładnyja ličby buduć zaležać ad načynki, azdableńnia i h.d. Ale tak, mietr u našym hatovym domie abydziecca ŭ vyniku dalaraŭ u 700–800.

Asobnaje pytańnie — kolki zojmie budaŭnictva. Kali dom zakazvać, a nie budavać samomu — ad vaśmi miesiacaŭ da 1,5 hoda. Pa sutnaści, stolki ž čakajuć tyja, chto ŭstupiŭ u dolevaje budaŭnictva.

Dom z błokaŭ

Dla budaŭnictva dobraha doma nieabchodny prajekt. Idealny varyjant — zamović jaho ŭ architektara ci zabudoŭščyka. Jon budzie kaštavać ad 400 da 900 dalaraŭ. Inžynierna-hieałahičnyja rosšuki pad budaŭnictva abyducca jašče ŭ 1000–1200 dalaraŭ.

Chata z cehły abo hazasilikatu ciažkavaty, pad jaho zapatrabujecca vialiki padmurak, jaki vyciahnie z kašalka razam z koštam ziemlanych rabot jašče kala 6–8 tysiač dalaraŭ. Darečy, takija damy spažyvajuć šmat enierhii ŭzimku, ich daviadziecca ŭciaplać, a heta dadatkovyja vydatki.

U pryncypie raźličyć, u kolki vyljecca budaŭnictva doma ŭłasnymi siłami, składana. Ale ludzi, što dabudavali svaje damy, kažuć: abyšłosia ŭsio ž taki tańniej, čym 1000 dalaraŭ za kvadratny mietr.

Novyja technałohii

Era amal biaspłatnaj enierhii prachodzić, i ciapier luby, chto buduje dom, užo zadumvajecca, kolki hety dom budzie spažyvać na abahravańnie. Tamu ŭsio papularniejšymi robiacca draŭlanyja damy i damy ź nietradycyjnych materyjałaŭ, naprykład, karkasnyja ŭcieplenyja i damy ź niazdymnaj apałubki. Abodva varyjanty, darečy, lohkija i patrabujuć mienš vydatkaŭ na padmurak. Akramia taho, ścieny doma ź niazdymnaj apałubki možna ŭźvieści za try tydni siłaj dvuch čałaviek. Abyducca jany adsotkaŭ na 30 tańniej, čym ścieny z hazasilikatu. Dom budzie tryvałym i ciopłym — ale na ścienach i padmurku ekanomija zakančvajecca. Astatniaje budzie kaštavać stolki ž, kolki i pry pabudovie zvyčajnaha cahlanaha doma.

Karkasnyja damy (draŭlany karkas, ścieny sa šmatsłojnych plit i ŭciaplalnika) firmy prapanujuć pad kluč. Dla nas jany navinka, ale ŭ Kanadzie, dzie klimat nie lepšy, jany šyroka raspaŭsiudžanyja. Firmy, hatovyja pabudavać karkasny dom pad kluč, abiacajuć, što abydziecca dom u 300 dalaraŭ za kvadratny mietr. Ale pavodle hrubych padlikaŭ dom na 100 kvadratnych mietraŭ z usimi kamunikacyjami, unutranym i vonkavym azdableńniem, u jaki možna pryvieźci meblu i zasialicca, abydziecca ŭ 550–650 dalaraŭ za kvadratny mietr. Tańniej za panelku na minskaj uskrainie.

Maleńki dom za 20 tysiač

Na rynku pryvatnaha domabudavańnia źjaviŭsia jašče adzin cikavy i niedarahi vid žylla — mabilny dom. Dom hety nie maje patreby ŭ rehistracyi i navat u padmurku — jaho pryvoziać na ŭčastak užo zmantavanym, ustaloŭvajuć, padłučajuć da kamunikacyj (kali kamunikacyi jość). Dom składajecca z karkasa i panelaŭ ścien. Vytrymlivaje marazy da -20. Vytrymaje i -30, ale elektryčnaści na aciapleńnie źjeść bolš za zvyčajny. Damki standartnaj šyryni — 3,8 mietra. A voś daŭžynia moža być da 12 mietraŭ. Samy maleńki damok — 24 mietry, vialiki mabilny dom — 44 kvadratnych mietry. Mietr abydziecca pakupniku ŭ 400 dalaraŭ biez azdableńnia i ŭ 600 dalaraŭ — z azdableńniem. Z azdableńnia abiacajuć nie tolki dźviery i vokny, ale i santechniku, elektryku, padłohu z łaminatu abo dyvanovaha pakryćcia, ścieny i stol, abklejenyja škłošpalerami.

Maleńki trochpakajovy 24-mietrovy damok užo z meblaj u kuchni-haścioŭni, dziciačym pakoi, spalni, z koŭdrami, paduškami, štorami, lusterkami i bra abydziecca pakupniku ŭ 20 tysiač dalaraŭ. Hladzicca, praŭda, nie zusim — skrynačkaj. Ale vytvorca hatovy prybudavać da jaho za dadatkovuju płatu draŭlanuju krytuju vierandu — i domik pieratvarajecca ŭ miesca, dzie chočacca žyć. Prynamsi letam.

Budź u kursie

Pieršaje, z čym sutykniecca čałaviek, jaki choča pabudavać dom, heta prablema pošuku ziamli. U 20-kiłamietrovym pryharadzie Minska možna znajści pryvatyzavany ŭčastak u najaŭnaj katedžnaj zabudovie, da jakoha ŭžo padviedzienyja kamunikacyi. Košty pačynajucca ad 10 tysiač dalaraŭ za 12 sotak. Kab zavieści kamunikacyi ŭ dom, raźličvać treba jašče na 5–8 tysiač dalaraŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?