U sudzie Leninskaha rajona Minska adbyŭsia razhlad administratyŭnaj spravy Ivana Amielčanki — aŭtara płakata «Musarok», zatrymanaha ŭčora ŭ Leninskim RUUS. Na jaho skłali pratakoł pa artykule 17.1 KoAP («Drobnaje chulihanstva»). Spravu razhladaŭ sudździa Michaił Choma, paviedamlaje spring96.org
Jak paviedamlałasia raniej, Ivan Amielčanka ŭčora, 15 maja, razam z advakatam pajšoŭ u aporny punkt u staličnym mikrarajonie «Łošyca». Bo jamu nadakučyła, što milicyjanty jaho ŭsiudy šukajuć i ŭ suviazi z hetym turbujuć baćkoŭ i znajomych. Adtul jaho nakiravali ŭ Leninski RAUS. Ale advakata razam ź Ivanam nie puścili.
Noč Amielčanka pravioŭ u Centry izalacyi pravaparušalnikaŭ na Akreścina.
«Palavać» na maładoha čałavieka pačali paśla šeścia na 26 krasavika. Tady jon z samarobnym płakatam «Musarok» staŭ pobač z adnym sa słužbistaŭ u cyvilnym, jakija naviaźliva zdymali na kamiery ŭdzielnikaŭ mirnaha, sankcyjanavanaha šeścia.
