19 maja u dzień praviadzieńnia finału Lihi Čempijonaŭ u Homieli adbyŭsia čarhovy etap futbolnaha kubka «Spravavodstva pa-biełarusku!»-2012.
Meta turnira – zaachvocić ludziej da bolš šyrokaha ŭžytku biełaruskaj movy, kaža Ihar Słučak, kiraŭnik inicyjatyvy.
Hetym razam hulali 6 kamand: «SpB-09» («Spravavodstva pa-biełarusku!»), «PTK» (sajt Pytalnik.tk), «Zamiežnyja studenty», «Mierv» (kamanda turkmienaŭ), «Askord» (haradskaja kamanda) i «BiełHUT» (studenty Biełaruskaha dziaržaŭnaha ŭniviersiteta transpartu).
Ahułam było praviedziena 9 matčaŭ plus 3 sieryi pienalci.
Pieramožcam turniru stała kamanda arhanizataraŭ – «SpB-09». Druhoje i treciaje miesca zaniali «Askord» i «Zamiežnyja studenty» adpaviedna.
Hulni kamientavali pa-biełarusku Ihar Słučak i Jaŭhien Maroz. Apošni źjaŭlajecca trenieram kamandy «SpB-09». Chłopiec navučajecca ŭ Muzyčnaj akademii. Jon karaniami z Rasiei, ale daŭno žyvie ŭ Homieli i viedaje movu.
Cikava, što na papiarednim turniry znajšoŭsia turkmien, jaki havaryŭ pa-biełarusku.
«Heta była ciažkaja pieramoha. Try kamandy mahli stać čempijonami, ale im stała «SpB-09», i heta simvalična.
Samaja biełaruskamoŭnaja kamanda pieramahła dastojna, nie prajhraŭšy nivodnaha matča. Ja vielmi hanarusia chłopcami»,— kaža Maroz.
Usie ŭdzielniki turnira atrymali pamiatnyja padarunki, a kamandy-pieramožcy — jašče i kubki. Najlepšym hulcom turniru byŭ pryznany bramnik «SpB-09». Kamanda «PTK» atrymała pryz «za stabilnaść», bo ŭdzielničała va ŭsich etapach Kubka.
Pieršy kubak «Spravavodstva pa-biełarusku!» adbyŭsia ŭ śniežni 2011 hoda. Tady pieramahła kamanda «HumNo». U hetym hodzie kubak pravodzicca ŭ 4 etapy. Zimovy i viesnavy turniry ŭžo zhulanyja, napieradzie jašče dva.
Udzieł u Kubku-2012 moža ŭziać lubaja kamanda i ź luboha etapa. Arhanizatary nie vyklučajuć praviadzieńnie hulniaŭ i ŭ inšych haradach.
