Ministr zamiežnych spraŭ Narodnaj Respubliki Banhładeš Dzipu Moni naviedaje z aficyjnym vizitam Biełaruś 21–24 maja.

U MZS padkreślili, što hety vizit stanie pieršym u historyi dvuchbakovych adnosin vizitam na ŭzroŭni kiraŭnika źniešniepalityčnaha viedamstva Banhładeš u Biełaruś.

Prahramaj vizitu praduhledžany sustrečy z prem'jer-ministram Biełarusi Michaiłam Miaśnikovičam i ministram zamiežnych spraŭ Siarhiejem Martynavym, kiraŭnictvam Biełaruskaj kalijnaj kampanii i Minskaha traktarnaha zavoda.
Płanujecca abmierkavać kompleks pytańniaŭ dvuchbakovaha supracoŭnictva, uklučajučy abmien vizitami na vysokim uzroŭni, raźvićcio dahavorna-pravavoj bazy, pašyreńnie pastavak biełaruskich kalijnych uhnajeńniaŭ i sielskahaspadarčaj techniki na banhładešski rynak, uzajemadziejańnie ŭ ramkach mižnarodnych arhanizacyj, naładžvańnie supracoŭnictva ŭ humanitarnaj śfiery i inšyja pytańni, jakija ŭjaŭlajuć uzajemny intares.

Čakajecca, što ŭ chodzie vizitu ministra zamiežnych spraŭ Banhładeš u Biełaruś budzie padpisany mižviedamasny miemarandum ab supracoŭnictvie ŭ halinie sielskaj haspadarki.

Dzipu Moni naviedaje miemaryjalny kompleks «Chatyń», a taksama ŭskładzie vianok da manumienta Pieramohi ŭ Minsku.

Dypłamatyčnyja adnosiny pamiž Biełaruśsiu i Banhładeš ustanoŭleny 21 lutaha 1992 hoda. Abjom biełaruska-banhładešskaha handlu ŭ 2011 hodzie skłaŭ $134,3 młn., ekspart ź Biełarusi — $121,2 młn. (rost u 2,4 raza ŭ paraŭnańni z 2010 hodam). 98% ekspartu skłali kalijnyja ŭhnajeńni ($118,4 młn.). Ekspartavalisia taksama renthienaŭskaja aparatura, žhut sintetyčnych nitak, traktary i inšaja pradukcyja.

U studzieni-sakaviku 2012 hoda tavaraabarot z Banhładeš skłaŭ $2,4 młn. i pradstaŭleny vyklučna impartam z Banhładeš (adzieńnie, tytuniovaja syravina, praža z džutavych vałoknaŭ).

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?