Alimpijskaja zbornaja Biełarusi pa futbole maje prablemy va ŭsich linijach, zajaviŭ hałoŭny trenier kamandy Hieorhij Kandraćjeŭ 21 maja na pres-kanfierencyi, pryśviečanaj budučamu ŭdziełu ŭ mižnarodnym turniry ŭ Tułonie (Francyja).

Pavodle słoŭ Kandraćjeva, bazavym dla zbornaj źjaŭlajecca 1989 hod naradžeńnia futbalistaŭ, adnak u vyšejšaj lizie nacyjanalnaha čempijanatu niama nivodnaha centralnaha paŭabaronca hetaha ŭzrostu. Akramia taho, nie zabivajuć forvardy, tamu ŭ pašyranuju zajaŭku na Alimpijadu ŭklučany 28-hadovy forvard Siarhiej Karnilenka. Šerah futbalistaŭ naohuł nie majuć hulniovaj praktyki.

Na pieršym etapie turniru ŭ Tułonie Biełaruś sustreniecca ŭ hrupie V z Francyjaj (24 maja), Maroka (26 maja) i Mieksikaj (28 maja).
U hrupie, A vystupiać Turcyja, Japonija, Jehipiet i Niderłandy. Pa dźvie lepšyja kamandy vychodziać u paŭfinał, matčy hetaj stadyi projduć 30 maja. hulnia za 3-je miesca i finał adbuducca 1 červienia.

Jak adznačyŭ Kandraćjeŭ, heta budzie dla jaho pieršy turnir, dzie vynik nie maje vialikaha značeńnia. «Pierš za ŭsio, chaču na surjoznym uzroŭni pravieryć chłopcaŭ. U nas nie tak šmat ludziej, jakija padychodziać pad Alimpijskija hulni. Dla mianie vielmi važnyja maralna-valavyja jakaści. Kali čałaviek zhulaje praź nie mahu — pajedzie na Alimpijadu, kali nie — brać niama sensu», — skazaŭ Kandraćjeŭ.

Jon padkreśliŭ, što nie adychodzić ad raniej pradekłaravanaha pryncypu kamplektavańnia kamandy na Alimpijadu: na kvotu ŭ try hulcy starejšych za 23 hady pretendujuć u pieršuju čarhu futbalisty 1988 hoda naradžeńnia, jakija zdabyvali pucioŭku ŭ Łondan. «U toj ža čas, ja nie mahu brać ludziej, jakija nie hatovy, i tym samym padvodzić astatnich», — zaŭvažyŭ Kandraćjeŭ. Pry hetym jon vykazaŭ upeŭnienaść, što na Alimpijadzie zbornaja vyjdzie z padhrupy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?