U niekatorych VNU Biełarusi pavodle vynikaŭ ustupnaj kampanii 2012 hoda moža być niedabor pieršakurśnikaŭ na navučańnie za košt srodkaŭ biudžetu. Pra heta ministr adukacyi Siarhiej Maskievič paviedamiŭ žurnalistam 21 maja ŭ Minsku.
Čakajecca, što ŭ ciapierašniaj ustupnaj kampanii voźmuć udzieł pryblizna 100 tys. čałaviek. Prykładna 10–12% nie zmohuć pretendavać na miescy ŭ VNU: taki pracent abituryjentaŭ tradycyjna nabirajuć mienš za siem bałaŭ na ispytach CT, i sioleta pryniata rašeńnie nie dapuskać ich da ŭdziełu ŭ konkursie na pastupleńnie ŭ VNU.
Pry hetym, pavodle źviestak Minadukacyi, na ŭsie formy atrymańnia adukacyi ŭ dziaržaŭnych i pryvatnych VNU zapłanavana pryniać pryblizna 91,6 tys. čałaviek.U 2011 hodzie ŭ VNU było pryniata 89,7 tys., pryčym kolkaść abituryjentaŭ była bolšaj, čym u 2012 hodzie.
«Ja nie dumaju, što ŭ VNU budzie niejkaja surjoznaja zaniepakojenaść z punktu hledžańnia taho, što buduć niedabory, — prakamientavaŭ ministr. — Ja dumaju, što najlepšyja VNU buduć mieć lepšy vynik, a tyja, jakija abo horš papracavali, abo mienš prestyžnyja, mahčyma, nie poŭnaściu sfarmirujuć biudžetny nabor». Pavodle jaho słoŭ, «asobnyja kropkavyja prablemy», źviazanyja ź niezapoŭnienymi miescami na biudžetnaj formie navučańnia, byli i letaś, adnak heta praduhledžvałasia. «Ja nie baču nijakaj pahrozy, i zaniepakojenaści nijakaj niama, što my pakiniem biez kadraŭ tuju ci inšuju śfieru abo halinu», — skazaŭ Maskievič.
«Bolš prablem» možna čakać blizu vosieni, kali abituryjenty vyznačajucca z pastupleńniem na płatnuju formu navučańnia.«Tam mohuć być niejkija ciažkaści, u zaležnaści ad taho, jakija pryjarytety naša moładź siońnia vybiraje: mnohim chaciełasia b pajści na tradycyjna papularnyja ekanamičnyja, jurydyčnyja śpiecyjalnaści, a sioleta kolkaść miescaŭ budzie mienšaj», — skazaŭ ministr.