Na minułym tydni naš Internet uskałamuciŭ dopis dziaŭčyny Iryny na Onliner.by. Tekst ab tym, što joj nie chapaje jaje štomiesiačnaha zarobku $700 na toje, kab kuplać novuju vopratku dy adkładać na adpačynak, zasmuciŭ forum nastolki, što za sutki pad im źjaviłasia amal 2 tysiačy kamentaroŭ. Vy možacie sabie ŭjavić: 2 tysiačy? Nie da naviny, nie da sensacyjnaha vykazvańnia palityka, a da artykuła dziaŭčyny Iryny ab ułasnym žyćci.
Stupień ahresii, jakaja vykazvałasia ŭ kamentarach mužčyn była takoj, što dziaŭčyna skazała ŭ interviju tamu ž Onliner.by: «Ja b pakazała vam svaje fota i navat nazvała svajo imia i prablema nie ŭ palitycy kanfidencyjnaści na majoj pracy. Ale ž vy mianie źniščycie! Vy pojdziecie ŭ sacyjalnyja sietki, vy raściahniecie ŭsie maje tvity i statusy pa kavałačkach, vy napišycie da ich miljon kamentaroŭ u abmien na maju ščyraść z vami (...)
Tamu što kožny z vas asobna – niebłahi čałaviek. Ale ŭ Internecie i razam vy – natoŭp. I ja vas bajusia».U tym ža interviju jana dadała, što na jaje dumku žančyna ŭ Biełarusi pavinna zarablać $2000, mužčyna $4000 i tady možna žyć pa-čałaviečamu: chata, mašyna.
Ja nia budu stanavicca na bok Iryny ci jaje «vorahaŭ»-kamentataraŭ. Bo, jak zaznačyła adna post-marksistka na svajoj staroncy ŭ Fejsbuku (tak, tak! Hetu źjavu ŭžo abmiarkoŭvajuć filozafy dy sacyjolahi!): prablema nia ŭ tym, što było vykazana. Prablema ŭ tym, jak nie-intelihientna heta było vykazana. Abaraniać Irynu nia chočacca, tym bolš jana dobra abaraniaje siabie sama.
Tym bolš nia chočacca prajaŭlać salidarnaść z tymi, chto jaje ciapier ckuje: vykazvańni asobnych ź ich naohuł za miežami dabra i zła.
Što bolej važna, dyk heta toje, jakija sacyjalahičnyja vysnovy možna zrabić z hetaj «elektronnaj bojki» ab isnym stanie biełaruskaha hramadztva.Bo paśla pračytańnia niedzie sotaha kamenta na ciabie spuskajecca takoje hłybinnaje razumieńnie našaha suśvietu, našaha etasu, našaha kalektyŭnaha rozumu, što chočacca adkłaści spravy dy pravieści niekalki dzion u medytacyi.
Abodva zalinkovanyja teksty vielmi raim vyvučyć usim, chto vyłučajecca ŭ prezydenty ci deputaty ŭ hetaj krainie. Surjozna. Svoj narod treba viedać i adčuvać.
I, ułasna, vysnovy:
1.
Biełarusy žyvuć biedna. Z kamentaroŭ bačna, što ŭ Miensku niašmat ludziej, jakija atrymlivajuć $700.
Treba pry hetym razumieć, što takoje Onliner.by: hety sajt niekali sabraŭ supolnaść čytačoŭ, jakija abmiarkoŭvali apošnija hadžety dy čakali reviu novych telefonaŭ\fotakamer\noŭtbukaŭ.
Pastupova na «Anłajnery» sfarmavaŭsia čytacki asiarodak, jakomu patrabavałasia niešta bolšaje, čym tolki hadžety, i sajt pačaŭ transfarmavacca (ab fenomenie Onliner.by dy jaho kamandy napisana vielmi šmat). Ale bolšaść (na majo adčuvańnie, ja mahu pamylacca) naviednikaŭ – heta mienavita taja samaja biełaruskaja «siaredniaja klasa», jakaja cikavicca Apple i Samsung bolej, čym KCHP BNF. Kali hetaja klasa naohuł niedzie isnuje, jana isnuje na «Anłajnery». Heta nie žabraki dy łuzery, tyja ludzi, jakija čytajuć tut forum i ŭdzielničajuć u im.
I voś vyśviatlajecca, što bolšaść z «dyskutantaŭ» nie atrymlivaje $700. Ci nia dziŭna?
2. Biełarusam nia soramna ad taho, što jany atrymlivajuć niašmat.
Pad artykułam Iryny my bačym kamentary kštałtu «zarobak 2 miljony i mnie chapaje».Takija kamentary pakidajuć žyvyja ludzi pad ułasnymi «nikami», nia boty: ludzi, što isnujuć na forumie stała, šmat hadoŭ. Možna prasačyć historyju kamentavańnia, zrazumieć intaresy. Usiudy ŭ inšych krainach ludzi chavajuć svaju biednaść. Ličać, što kali maješ $250, dyk niama čym hanarycca. Niama nahody dla fanaberyi. U nas – pa-inšamu. U nas jašče inšych vučyć hatovyja. Cikava!
3.
Mantraj pra «500 dalaraŭ zarobku» ŭrad sfarmavaŭ nia tolki «maru biełarusaŭ», adnak i stol, vyšej za jakuju štomiesiačny zarobak u ciabie padvyšacca nia moža. Bo zaplujuć.Kali maješ bolej, lepiej maŭčy.
4. U planie razumieńnia hiendernaj roŭnaści my znachodzimsia niedzie ŭ XVIII stahodździ. Abodva poły zychodziać z taho, što dziaŭčyna pavinna atrymlivać mieniej za mužčynu. Kamentataraŭ pryvodzić u varjactva toje, što «baba atrymlivaje bolej za mužykoŭ». Heta dla ich sapraŭdy niezrazumieła. Sama Iryna kaža, što mužčynu treba płacić $4000, žančynie – $2000.
Čamu?
Adkul naohuł sehrehacyja? My ž nie fizyčnaj pracaj usie zajmajemsia, a ŭ ofisie ad žančyny čaściakom bolej plonu, čym ad nas, mužykoŭ. Dyk čamu joj – u dva razy mieniej? Adkul hetyja zababony?
5. U mienčukoŭ pryncypova inšyja krynicy sacyjalnaha razdražnieńnia, čym u žycharoŭ inšych bujnych haradoŭ. Tym, kamu cikava, prapanuju paraŭnać historyju biełaruskaj «Iryny – siamsot baksaŭ» z davoli padobnaj (pavodle napału žarści) historyjaj dziaŭčyny Volhi, jakaja vykłała ŭ kastryčniku letaś repartaž ab tym, jak žyvie ŭ horadzie Dachabie (Ehipiet) razam z ułasnym kachanym, jaki prafesijna zajmajecca vindserfinham. Historyja Volhi, jakaja bavić čas kala mora, nikudy nie śpiašajecca, sustrakaje śvitanki i šmat zaharaje, źjaviłasia na sajcie fatohrafaŭ i adrazu ž vyklikała šalonaje kipieńnie tam. Ludziej uvodziła ŭ šał toje, što pryhožaja žančyna moža dazvolić sabie pavolny, spakojny ład žyćcia. Pačytajcie kamentary (375!) dy zaŭvažcie, jak padobnyja jany na kamenty na Onliner.by. Adnak u nas ludziej raźjušvaje toje, što niechta nia moža pražyć na $700, u Maskvie – toje, što niechta moža vypaści z alharytmu praca-chata-praca. Admovicca ad karjery dy być pry hetym ščaślivym.
Adčujcie roźnicu!
6. Udakładnim: biełarusy nia tolki nia bačać prablemy ŭ tym, što jany žyvuć nie zamožna. Jany bačać prablemu ŭ tym, što inšyja nie žyvuć jak žabraki.
7.
Atrymlivajučy 2 miljony rubloŭ, jany zadumvajucca nie ab tym, jak atrymlivać bolej, adnak – ab tym, jak ekanomić, u čym sabie admaŭlać, kab hetych 2 miljonaŭ chapiła na miesiac.
8. Biełarusy ŭsprymajuć pachod u kaviarniu jak prykmietu dolce vita. Navat kali hetaja kaviarnia – «mak».
9. Hetaja sacyjalnaja sytuacyja nijak nie vylivajecca ŭ hałovach ludziej – zvyčajnych, nie palityzavanych ludziej – u hnieŭ da ŭłady. Dziaržava, ministry, prezydent naohuł adsutničajuć jak subjekty sprečki – prahladzicie pilna. Zrazumieła, što jość praviły forumu, zrazumieła, što možna atrymać papiaredžańnie, adnak kali b karcieła, to i praryvała b! Typovy «palityzavany» kament hučyć tut prykładna tak: «vo žyćcio ŭ Biełarusi! Čałaviek kaža, što atrymlivaje $700, a jamu kažuć – ty abarzieŭ!»
10. Pakul usio budzie tak, jak vykładziena ŭ papiarednich punktach, Łukašenka – najlepšy prezydent dla biełarusaŭ.
