Valancin Stefanovič byŭ uklučany ŭ bazu źviestak asob, jakim časova zabaronieny vyjezd za miažu, z-za techničnaha zboju. Pra heta havorycca ŭ liście načalnika departamienta pa hramadzianstvie i mihracyi MUS Biełarusi Alaksieja Biehuna, jaki pravaabaronca atrymaŭ 13 červienia.

Jak paviedamiŭ Stefanovič, u liście skazana: «Na naš zapyt u Ministerstva abarony ab pryčynach uklučeńnia źviestak pra Vas u bank danych pastupiŭ adkaz, što vajennymi kamisaryjatami Respubliki Biełaruś rašeńniaŭ ab časovym abmiežavańni Vašaha prava na vyjezd z Respubliki Biełaruś nie prymałasia. Razam z tym, zychodziačy z šerahu zvarotaŭ hramadzian, varta zaznačyć, što ŭ pieryjad z 24.02.2012 pa 10.03.2012 mielisia techničnyja zboi ŭ pieradačy infarmacyi ŭ bank danych, mahčymym vynikam jakich źjaviłasia pamyłkovaje ŭklučeńnie źviestak pra Vas u bank danych».

«Hetym časam u MUS pravodzicca praca pa praviercy praŭdzivaści ŭsich źviestak, što pastupili ŭ bank danych z upaŭnavažanych dziaržaŭnych orhanaŭ za zhadany pieryjad času. Paśla zakančeńnia hetaj pracy buduć pryniaty miery pa vyklučeńni pamyłkovych źviestak z banka danych zhodna z punktam 18 pałažeńnia «Ab banku źviestak ab hramadzianach Respubliki Biełaruś, prava na vyjezd jakich z Respubliki Biełaruś časova abmiežavana», — paviedamlajecca ŭ liście.

Kamientujučy hety adkaz, Stefanovič zajaviŭ:

«Ja viedaju, jak zaviecca hety „techničny zboj“, jaki „zboiŭ“ nastolki vybiralna, što ŭ bazu źviestak nievyjaznych pamyłkova trapili tolki apazicyjnyja palityki, niezaležnyja žurnalisty, pravaabaroncy i advakaty. Zastajecca spadziavacca, što ŭ departamiencie znojduć asob, vinavatych u raspaŭsiudžańni „škodnaha virusu“, i ŭzorna ich pakarajuć».

Pry hetym pravaabaronca zaznačyŭ, što Biahun nie ŭkazvaje, u jaki termin zakončycca pravierka i kali jaho vyklučać sa śpisa nievyjaznych. «Zdavałasia b, raz vy ŭstanavili, što heta zboj — adrazu ž vyklučajcie čałavieka z bazy źviestak. Ale nie, tak u nas spravy nie robiacca. I pakul budzie pravodzicca pravierka, ja zastajusia «nievyjaznym», — skazaŭ Stefanovič.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?