Knihazvarot z Maksimam-knižnikam

Čas, praviedzieny za dobraj knihaj, moža akazacca zusim nie zmarnavanym, a vielmi pryjemnym i navat u niečym niepaŭtornym.

Litaraturny muziej Maksima Bahdanoviča prapanuje ŭsim, nieabyjakavym da knihi, a taksama asoby i tvorčaści Maksima Bahdanoviča, uziać udzieł u akcyi «Knihazvarot z Maksimam-knižnikam».

Ideja jaje pazyčanaja z bukrosinhu — suśvietnaha ruchu pa «vyzvaleńni» knih. Ruch abjadnoŭvaje ludziej, jakija paśla pračytańnia knihi vyrašyli pakinuć jaje ŭ jakim-niebudź hramadskim miescy, kab inšy čałaviek moh hetuju knihu znajści i pračytać. Apošni, u svaju čarhu, pavinien zrabić ź joju toje samaje. Na siońniašni dzień prasačyć «padarožža» pakinutaj knihi možna praź śpiecyjalnyja sajty, dzie joj prysvojvajecca numar, a ŭ roznych haradach stvarajucca tak zvanyja «biaśpiečnyja» palicy, dzie kožny moža pakinuć svaju knihu i nie pieražyvać, što jana moža trapić da niedaśviedčanych ludziej i apynucca paprostu ŭ śmietnicy. U Minsku isnuje niekalki takich palicaŭ. Najbolš viadomyja ź ich — palica ŭ ofisie partała TUT.BY, palica ŭ kniharni «łohvinaŬ», palica ŭ kaviarni «Łondan».

Što da Maksima Bahdanoviča, to kłasik biełaruskaj litaratury, byŭ sapraŭdy apantanym čytalnikam: baćka, Adam Jahoravič, tak i nazyvaŭ syna — Maksim-knižnik, i, što cikava, hetaja mianuška paźniej stała adnym ź psieŭdanimaŭ paeta.

Kab uziać udzieł u «Knihazvarocie z Maksimam-knižnikam», nieabchodna nastupnaje:

a) vybrać lubuju biełaruskamoŭnuju knihu z ułasnaj biblijateki;

b) pryjści ź joju da pomnika Maksimu Bahdanoviču 15 červienia 2012 u 17.00.

v) uziać u supracoŭnika muzieja admysłovuju zakładku;

h) advieźci knihu ŭ miesca z «biaśpiečnaj» palicaj, zrabiŭšy fotafiksacyju.

Kožny, chto voźmie ŭdzieł u akcyi, atrymaje biaspłatny kvitok na kancert hurta «Nielha zabyć» u Litaraturnym muziei Maksima Bahdanoviča, jaki adbudziecca 15 červienia 2012 u 19.00.