Lidarka apazicyi Mjanmy raskazała, što pačuła ab premii pa radyjo, kali była ŭ źniavoleńni.
«I heta niby viarnuła mianie na ziamlu, bo časami ja ŭžo adčuvała siabie tak, niby ja bolš nie naležu da realnaha śvietu. Premija zrabiła mianie znoŭ realnaj, — skazała jana. — Ja zrazumieła ŭsiu važnaść Nobieleŭskaj premii — jana pryciahnuła ŭvahu śvietu da baraćby za demakratyju i za pravy čałavieka ŭ Mjanmie. Naša kraina nie budzie zabytaja».
Jeŭrapiejskaje padarožža Aŭnh San Su Čžy stała mahčymy, dziakujučy pracesu demakratyzacyi režymu Mjanmy.
Chunta zrazumieła, što dalejšaje zachavańnie sistemy viadzie da adstavańnia krainy i padryvu jaje čałaviečaha patencyjału. Režym pajšoŭ na pastupovaje, kantralavanaje adkryćcio krainy. Z turmaŭ vyjšła častka palitviaźniaŭ, a ŭ častcy akruh apazicyju prapuścili ŭ parłamient. U vyniku ich Su Čžy i niekalki dziasiatkaŭ jaje kaleh atrymali deputackija mandaty. Situacyja nahadvaje polskuju 1989 hoda.
Su Čžy zaścierahła ad ślapoha davieru ciapierašniamu režymu Mjanmy. Ale jana zajaviła, što jaje partyja hatovaja «adyhrać lubuju rolu ŭ pracesie nacyjanalnaha prymireńnia».
U svajoj nobieleŭskaj pramovie Su Čžy nahadała, što jana atrymlivaje hetuju premiju jak były palitviazień i što navat «adzin viazień sumleńnia — heta zašmat». A ŭ Mjanmie, skazała jana, u turmach zastajecca našmat bolš, čym adzin palitviazień. I nielha zabyvać mienš viadomych palitviaźniaŭ paśla taho jak vypuścili bolš viadomych.

Jana zaklikała da «adkaznaha inviestavańnia» ŭ svaju krainu.

U hutarcy z žurnalistami jana vykazała mierkavańnie, što ŭ pracesie reformaŭ Mjanmu čakaje šmat uźlotaŭ i padzieńniaŭ. I skazała, što krainie patrebna nacyjanalnaje prymireńnie.

Na pytańnie, što jaje najbolš uraziła za miažoju paśla 22 hadoŭ, jana adkazała z uśmieškaj: byvaje ciažka zrazumieć, jak karystacca sučasnymi kranami ŭ vannych pakojach.
Na radzimie — z hetych 22 hadoŭ — 15 jana praviała pad chatnim aryštam.

Su Čžy, dačka pieršaha kiraŭnika Mjanmy, jakaja tady nazyvałasia Birma, paśla zdabyćcia krainaj niezaležnaści, doŭhi čas žyła nie ŭ krainie. Jana viarnułasia tudy ŭ 1988 hodzie, kab hladzieć svaju staruju mamu. Na chvali Viasny Narodaŭ kanca 80-ch narodny ruch vynies jaje ŭ lidary. Adnak režym admianiŭ vyniki pieršych svabodnych vybaraŭ, a jaje pasadzili pad aryšt.

Jana admaŭlałasia vyjechać z krainy, navat dla atrymańnia Nobieleŭskaj premii ci na pachavańnie svajho muža-brytanca ŭ 1999-m: jana bajałasia, što jaje nie ŭpuściać nazad.

Niazłomnaja dysidentka vybrała dla svajoj nobieleŭskaj pramovy fijaletava-bezavaje adzieńnie. U vałasach u jaje była, jak zaŭždy, kvietka. Jana pramaŭlała sa spakojnaj hodnaściu.

Biełaruski pravaabaronca Aleś Bialacki byŭ vyłučany na Nobieleŭskuju premiju miru ŭ 2012 hodzie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?