U biełaruskich žančyn, jakija ciahnuć na svaich plačach biestałkovych mužoŭ, moža źjavicca novaja krynica zarobku. Niekatory čas tamu ŭ krainie zakanadaŭča ŭrehulavali pytańni surahatnaha maciarynstva. Ale kali ŭnutry krainy hety instytut pakul nie karystajecca papularnaściu, to zamiežža da pasłuh biełaruskich surahatnych mam vykazvaje žyvuju cikavaść. Niekalki kampanij, jakija zajmajucca miedycynskim turyzmam, vyrašyli zadavolić zamiežny popyt. «Arhanizacyja šukaje žančyn dla supracoŭnictva, uznaharodžańnie harantavanaje», — abjavy takoha rodu źjavilisia ŭ internecie. Jany nie toje kab pałochajuć. Ale biantežać — dakładna.

«$ 8–10 tys. za pasłuhi žančyna moža atrymać, — koratka prakamientavali ŭ adnym śpiecyjalizavanym ahienctvie. — Heta zaležyć ad niuansaŭ damovy».

U inšaj kampanii surahatnym maci harantujuć hanarar u $ 8 tys., $ 1 tys. na vopratku i štomiesiačnyja vypłaty ŭ 300 u.a. (miedycynskija i inšyja vydatki taksama apłačvajucca). U cełym čystymi vychodzić kala $ 10 tys. «Jość žorstkija patrabavańni: uzrost da 35 hadoŭ, najaŭnaść ułasnaha dziciaci, žančyna pavinna być zamužniaj i całkam zdarovaj, prajści ŭsie nieabchodnyja miedycynskija testy», — udakładniajuć śpiecyjalisty.

Pra što naohuł havorka? Trochi teoryi. Paniaćcie «surahatnaje maciarynstva» dla Biełarusi nie ekzotyka, ale pakul i nie źjava. Pad terminam zvyčajna razumiejuć vynošvańnie i naradžeńnie surahatnaj maci dziciaci, začataha ź jajcakletki, uziataj z arhanizma druhoj žančyny (hienietyčnaj maci). Zadačy pry hetym stajać humanistyčnyja: dapamahčy siamiejnym param, jakija pakutujuć na biaspłodździe, mieć dziciaci.

Vakoł surahatnaha maciarynstva tysiačy niuansaŭ, svarak i etyčnych sprečak. Suprać jaho vystupajuć kataliki i pravasłaŭnyja, u niekatorych krainach pasłuhi surahatnych maci zabaronienyja. Ale nie ŭ Biełarusi.
«My pavinny dać ludziam šaniec stać baćkami», — vykazała mierkavańnie zakanadaŭcaŭ deputat Pałaty pradstaŭnikoŭ Śviatłana Šyłava. — Surahatnaje maciarynstva nie supiarečyć etycy da taho času, pakul jano zychodzić ź miedycynskich pakazańniaŭ i vyklučaje sacyjalnyja pryčyny, kali žančynie lanota vynošvać dzicia, žančyna baicca rodaŭ ci nie choča ciažarnaściu pieraškadžać svajoj karjery».

Biełaruskija ekśpierty nie raz zajaŭlali, što surahatnaha maciarynstva bajacca nie treba, što jano nie budzie karystacca ŭ krainie papularnaściu, bo mientalna nieprymalnaje dla nasielnictva. I na tabie: «Arhanizacyja šukaje žančyn…»

«Dla siabie surahatnaje maciarynstva my tolki adkryvajem, ale adkryvajem niezdarma, — tłumačyć Uładzisłaŭ, pradstaŭnik minskaj kampanii, jakaja śpiecyjalizujecca na miedycynskim turyźmie. — Jość zvaroty z Maskvy, ź Litvy, z Łatvii, jość zamiežnyja partniory, hatovyja pasyłać klijentaŭ u Biełaruś štomiesiac, pačynajučy ź niekalkich siemjaŭ, a potym i bolš. Prablemy, źviazanyja z repraduktyŭnaj funkcyjaj nasielnictva, vostra stajać va ŭsim śviecie. Naprykład, našy partniory ŭ Izraili ŭ hod adpraŭlajuć u roznyja krainy kala 180 par. Treba ŭličvać, što ź pieršaha razu nie zaŭsiody atrymlivajecca padsadzić embryjon surahatnaj maci. Byvaje, i dva, i try razy ludzi jeduć u Hruziju, Ukrainu, Armieniju. Čamu b im nie pryjechać u Biełaruś? "

Zvyčajny biźnies: u Jeŭropie za surahatnaje maciarynstva prosiać značna bolš, u Biełarusi ŭzrovień žyćcia nižej. Našy žančyny, kaža Uładzisłaŭ, hatovyja prapanoŭvać pasłuhi surahatnych maci tańniej. Pahutaryŭšy ź ludźmi, vyvučyŭšy forumy, śpiecy vyrašyli, što płanka ŭ $ 10 tys. całkam prymalnaja. Sami ž bijałahičnyja baćki zapłaciać bolš — 20–25 tys. u.a.

«Pa sutnaści, dziaržava prapanuje žančynam takuju pracu — być surahatnaj maci, — razvažaje naš surazmoŭca. — Matyvy tut mohuć być roznyja. Z adnaho boku, heta žadańnie dapamahčy ludziam, niachaj i zamiežnikam, zavieści dziciaci. Ź inšaha — mahčymaść dapamahčy svajoj siamji, jakaja, vidavočna, znachodzicca ŭ ciažkoj situacyi. Moža, jość prablemy z mužam, ci zvolnili z pracy… "

Na zaŭvahu pra toje, što moža zdacca, byccam my vystaŭlajem našych žančyn na «ekspart», jon adkazaŭ: «Zrazumieła, nie. Surahatnaje maciarynstva raźvivajecca va ŭsim śviecie, heta całkam narmalna. Biełaruskaje zakanadaŭstva siońnia aptymizavanaje, i ŭ bližejšy čas, dumaju, my možam sutyknucca z bumam u hetaj śfiery».

Ci lehalny hety biźnies? U Pałacie pradstaŭnikoŭ ŭdakładnić niuansy nie zmahli, u Ministerstvie achovy zdaroŭja vykazali zdahadku, što heta śfiera jurysdykcyi Miniusta, jurysty dakładnaha adkazu nie dali.

U samoj kampanii zapeŭnivajuć, što pracujuć na całkam zakonnych padstavach:
«Pakul naša zakanadaŭstva prablematyčna traktuje aśpiekty akazańnia miedycynskich pasłuh dla zamiežnych hramadzian. Ale jurydyčnaja mahčymaść isnuje. Tut ustupajuć mižnarodnyja pahadnieńni pamiž dziaržavami, naprykład».

Žadajučyja paŭdzielničać u prahramie, kažuć śpiecyjalisty, jość. Jany darosłyja ludzi, heta ich vybar. Možna doŭha maralizavać pra dziesiać tysiač dołaraŭ i tainstva maciarynstva, dy što tołku? Kali jość popyt i jość prapanova, u spravu ŭstupajuć zakony rynku.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?