MZS Litvy: Infarmacyja KDB Biełarusi pra špijanaž nie adpaviadaje rečaisnaści 4

«Abvieščanaja na aficyjnaj staroncy KDB Biełarusi infarmacyja nie adpaviadaje rečaisnaści. Takija insinuacyi śpiecsłužbaŭ susiedniaj krainy nie sadziejničajuć palapšeńniu dvuchbakovych adnosin «, — havorycca ŭ kamientary MZS Litvy z nahody infarmacyi ab zatrymańni ŭ Biełarusi rezidenta vajennaj vyviedki Litvy i asob, jakija znachodziacca ŭ jaho na ahienturnaj suviazi, ru.delfi.lt

Nahadajem, što siońnia KDB abnarodavaŭ infarmacyju, što spyniena špijonskaja dziejnaść biełaruskich hramadzian, «jakaja ažyćciaŭlałasia ŭ intaresach śpiecsłužbaŭ Litvy».

«Padčas praviadzieńnia ahienturnaj akcyi supracoŭniki KDB zatrymali z dokazami złačynstva rezidenta vajskovaj vyviedki Litvy. Adnačasova pa fakcie pieradačy zamiežnaj śpiecsłužbie sakretnych źviestak byli zatrymanyja asoby, jakija znachodzilisia ŭ jaho na ahienturnaj suviazi», — raspaviali ŭ kamitecie. U vyniku praviedzienych apieratyŭna-vyšukovych mierapryjemstvaŭ byli kanfiskavanyja elektronnyja nośbity i inšyja pradmiety i materyjały, jakaja vykryvajuć špijonskuju dziejnaść zatrymanych, nakiravanuju na atrymańnie sakretnaj infarmacyi ŭ vajennaj śfiery, u tym liku ŭ ramkach adzinaj sistemy biaśpieki Sajuznaj dziaržavy. Akramia taho, dakumientalna byli paćvierdžany fakty praviadzieńnia ahienturnaj hrupaj apieracyj pa zdabyvańnia infarmacyi z vykarystańniem techničnych srodkaŭ z metaj ich dalejšaj pierapraŭki za miažu. «Fakt supracoŭnictva ź litoŭskimi śpiecsłužbami paćviardžajecca sabranymi ŭ chodzie śledstva dokazami, a taksama pryznalnyja pakazańni samich abvinavačanych», — padkreślili ŭ KDB.

Pa zaklučeńni ekśpiertaŭ sabranyja i padrychtavanyja dla pieradačy litoŭskaj śpiecsłužbie materyjały adnosiacca da źviestak, što składajuć dziaržaŭnyja tajamnicy Biełarusi. U dačynieńni da zatrymanych raspačata kryminalnaja sprava pa art. 356 KK Biełarusi (zdrada dziaržavie). Im pahražaje pakarańnie ŭ vyhladzie pazbaŭleńnia voli na termin ad 7 da 15 hadoŭ.