Spytajcie luboha režysiora, jaki zdymaje filmy z praciahami, na jakoj častcy franšyzy varta spynicca, kab nie hańbicca i pakinuć pra siabie dobruju pamiać, i jon vam adkaža - na treciaj. Usio ž taki trochčastkavuju strukturu tvora nichto nie admianiaŭ.
Pačali, razhajdalisia, pašumieli i skončyli, chopić: da čaćviortaha filma hieroi ŭžo apynajucca ŭ domie sastarełych i sprabujuć uspaminać staryja dobryja časy pierad paŭpustymi kinazałami.
Urešcie, «Matrycaŭ» było try, nie kažučy ŭžo pra «Uładara piarścionkaŭ".Miła Jovavič budzie zmahacca z zombi choć da piensii, ale da «Prystanku zła» nichto ŭžo surjozna nie stavicca, a Indyjana Džons źjaviŭsia ŭ nulavych, kab zbeścić nam uspaminy dziacinstva, dzie jamu samaje miesca.
Sioleta «Lednikovamu pieryjadu» spoŭniłasia roŭna 10 hadoŭ: mienavita ŭ 2002-m mamant Meni padabraŭ dzicia pieršabytnaha čałavieka i pasiabravaŭ sa śmiešnym laniŭcam Sidam i bajaźlivym šablazubym tyhram Dyjeha.
U 2006 u «Lednikovym pieryjadzie — 2» zdaryłasia hłabalnaje paciapleńnie, a Meni znajšoŭ sabie mamancichu Eli, jakaja dumała, što jana aposum, i spała ŭniz hałavoj, abchapiŭšy chvastom halinku. U 2009 ščaślivaja para chobatavych čakaje ŭžo prybytku siamiejstva, ale Jurski pieryjad tak lohka nie adpuskaje, davodzicca pabiehać ad raźjušanaj tyranazaŭrychi, čyje jajki skraŭ tupavaty Sid.
Tut čas by i zakruhlacca, ale aŭtary franšyzy vidavočna ściamili, što tady skončać historyju mienavita tam, dzie pačaŭsia «Amierykanski piroh».
Heta značyć, niadrenna było b pahladzieć, jak pačnie siabie pavodzić padrosły naščadak mamantaŭ u pieryjad pałavoha vyśpiavańnia.
U čaćviortaj častcy praciah rodu Meni zavuć hetak ža, jak dačku Boba Hełdafa, - Pičes, jana ŭžo padletak i zakachałasia ŭ hałoŭnaha pryhažunčyka miascovaha schiłu, jaki ŭsiudy chodzić ź dźviuma papularnymi mamancichami, u jakich čubki i ledź nie sumki «Birkin». Heta viarški miascovaj elity, i pavodziać jany siabie jak błandynki z «Kiepskich dziaŭčat». Dziakuj bohu, što «Lednikovy pieryjad - 4» - dziciačy mulcik, a nie «Amierykanski piroh».
Adnahodki tolki źlohku ździekujucca z taho, što tata nie dazvalaje Pičes hulać da paŭnočy (adzin ź niamnohich «darosłych» žartaŭ u filmie: «Hulać z chłopčykami ty zmožaš tolki paśla majoj śmierci. I toje pačakaj jašče dni try -- pierakanajsia, što ja sapraŭdy miortvy»).
Pakul Meni zaścierahaje dačku ad pieršaj zakachanaści, u žyviolnym śviecie postlednikovaha pieryjadu adbyvajucca važnyja pracesy, jakija ŭ realnaści zdarylisia za dziasiatki miljonaŭ hadoŭ da taho, jak žyli mamanty.
U Halivudzie, jak viadoma, svaja realnaść, miljon hadoŭ tudy-siudy - drobiaź i całkam daravalnaje dapuščeńnie.Usieahulnaja ŭlubionka, vaviorka Skret, jakaja pavodzić siabie ŭ dačynieńni da žołuda, jak Horłum, jaki ŭbačyŭ piarścionak, zvaliłasia na samaje jadro Ziamli i, paskakaŭšy na im, razahnała kantynienty pa suśvietnym akijanie. Tektaničny zruch pahražaje źniščeńniem zvykłamu areału Meni i jaho kamandy, ich vynosić u adkryty akijan, dzie mamant, tyhr, laniviec i jaho bojkaja babula, što zhubiła skivicu, traplajuć u pałon da raznamasnaj chieŭry pirataŭ (šympanze, trus, ciuleń, kienhuru i šablazubaja kotka).
Ułasna, modnaja paśla «Pirataŭ Karybskaha mora» tema z zachopami sudnaŭ - adzinaje novaje, što, pa vialikim rachunku, źjaviłasia ŭ «Lednikovym pieryjadzie».Nu, jašče Sida abvodziać vakoł palca chitryja svajaki, Dyjeha znachodzić ramantyčny intares, maleńkaja mamancicha ŭśviedamlaje, što siamja važniejšaja za niejkaha chłopca, nu, adkryli pa darozie Amieryku raniej za Kałumba na dziasiatki tysiač hadoŭ dy prahny da žałudoŭ Skret zatapiŭ pa darozie Atłantydu.
Ničoha asabliva novaha za paŭtary hadziny ŭ «Lednikovy pieryjad - 4» nie adbyvajecca. Jak i ŭ «Amierykanskim pirahu - 4». Jak i ŭ «Prystanku zła - 4». Jak i ŭ «Terminatary-4», dy i ŭ «Šreku-4» taksama.
Čaćviortaja častka tut patrebnaja (akramia vidavočnaha - zarablańnia lohkich hrošaj), kab Meni znoŭ zrabiŭ dobry tvar, Sid pastroŭ durnia, Dyjeha prajaviŭ vysakarodnaść i znajšoŭ svaju tyhrycu, a Skret znoŭ kryčaŭ, ubačyŭšy žołud.
My ž lubim viartacca ŭ miescy, dzie nam było dobra.
«Lednikovy pieryjad» u sensie idej dla dalejšych sikvełaŭ - udziačnaja hleba. Napieradzie jašče evalucyja nieandertalca ŭ homo sapiens, staražytnyja Rym z Hrecyjaj, kudy mamanty całkam mohuć trapić dziakujučy vielmi volnaj fantazii scenarystaŭ«Lednikovaha pieryjadu» (sireny ŭžo jość u čaćviortaj častcy). A potym, kali «aryhinalnyja» idei vyčarpajucca, možna budzie źniać «Lednikovy pieryjad - 21» pra znojdzienaje niadaŭna ŭ Sibiry zamarožanaje mamanciania, jakoje dazvolić bijołaham adnavić jaho DNK i naohuł uvieś vyhlad. I voś tolki tady možna budzie narešcie abjadnać 2 franšyzy i zaadno ich strasianuć.
Hledačy! Rychtujciesia da «Lednikovaha pieryjadu suprać Madahaskara: Kali Meni sustreŭ Marci. Apošniaja mutacyja».
I heta nie fantazija aŭtara. U śviecie, dzie Linkaln siače siakieraj vampiraŭ, kaŭboi zmahajucca ź inšapłaniecianami, a Kira Najtli hraje Annu Kareninu, mahčyma ŭsio.
