24 lipienia Minski haradcki sud nie zadavoliŭ kasacyjnuju skarhu hramadskaha aktyvista Vasila Parfiankova na prysud ab aryšcie na 6 miesiacaŭ za nievykanańnie umovaŭ previentyŭnaha nahladu, ustanoŭlenaha sudom.
Pakul Vasil Parfiankoŭ zastajecca na voli. Jon nie zatrymany i budzie čakać nakiravańnia ŭ aryštny dom pa miescy žycharstva ŭ adpaviednaści z zakanadaŭstvam.
29 maja Vasil Parfiankoŭ byŭ asudžany pa artykule 421 Kryminalnaha kodeksa Respubliki Biełaruś sudździoj Pieršamajskaha rajona Minska Siarhiejem Bandarenkam.
Previentyŭny nahlad terminam na adzin hod, u parušeńni jakoha pryznany vinavatym były palitviazień, byŭ ustanoŭleny za im z 5 studzienia. Padstavaj dla hetaha staŭ aktyŭny udzieł Parfiankova ŭ hramadska-palityčnym žyćci paśla taho, jak jon siarod inšych viaźniaŭ Płoščy-2010 byŭ vyzvaleny ŭ žniŭni 2011 hoda ŭ adpaviednaści z ukazam prezidenta pra pamiłavańnie, paviedamlaje Radyjo Svaboda.
***
27-hadovy Parfiankoŭ — pieršy asudžany pa spravie ab masavych biesparadkach 19 śniežnia 2010 hoda. 17 lutaha 2011 hoda sud Frunzienskaha rajona stalicy pryznaŭ jaho vinavatym va ŭdziele ŭ masavych biesparadkach i pryhavaryŭ da čatyroch hadoŭ pazbaŭleńnia voli z adbyvańniem pakarańnia ŭ kałonii strohaha režymu. Akramia taho, Parfiankoŭ pavinien byŭ vypłacić bolš jak 14 młn. rubloŭ za pabitaje škło dźviarej u Domie ŭrada padčas niesankcyjanavanaj akcyi apazicyi.
Asudžany adbyvaŭ pakarańnie ŭ Aršanskaj papraŭčaj kałonii. 11 žniŭnia 2011 hoda Parfiankoŭ byŭ pamiłavany ŭkazam Łukašenki.
