KDB zatrymaŭ niekalki chabarnikaŭ u Dziaržkantroli 8

Jak paviedamili ŭ centry infarmacyi i hramadskich suviaziaŭ KDB, u vyniku praviadzieńnia kompleksu apieratyŭna-vyšukovych mierapryjemstvaŭ praduchilena supraćpraŭnaja dziejnaść staršaha inśpiektara pa asabliva važnych spravach upraŭleńnia ŭłasnaj biaśpieki departamienta finansavych rasśledavańniaŭ KDK padpałkoŭnika finansavaj milicyi D. Pavodle najaŭnaj infarmacyi, na praciahu niekalkich hadoŭ ad zasnavalnikaŭ i słužbovych asob kamiercyjnych struktur Minska jon atrymlivaŭ hrašovyja ŭznaharody za spryjańnie ŭ vyrašeńni roznych prablem, źviazanych z praviadzieńniem kantralujučymi orhanami pravierak.

U vyniku pravierki było ŭstanoŭlena koła pradprymalnikaŭ, ad jakich supracoŭnik DFR na pastajannaj asnovie atrymlivaŭ hrašovyja srodki i inšyja tavarna-materyjalnyja kaštoŭnaści. Na niepracoŭnyja dachody jon budavaŭ dvuchpakajovuju kvateru ŭ elitnym domie ŭ stalicy. Budmateryjały jamu pieradavali biaspłatna «ŭ lik vyrašeńnia budučych prablem».

Pravierka KDB uskładniałasia tym, što supracoŭnik finansavaj milicyi praciahły čas sam zajmaŭsia apieratyŭna-vyšukovaj dziejnaściu, viedaŭ pra formy i mietady praviadzieńnia apieratyŭnych mierapryjemstvaŭ.

Svaich «klijentaŭ» jon staranna instruktavaŭ, sustrečy pravodziŭ u zahadzia abumoŭlenych miescach z vykanańniem mier kanśpiracyi.

Majučy dostup da materyjałaŭ pravierki pa fakcie ŭchileńnia ad vypłaty padatkovych płaciažoŭ, što pravodziłacia ŭ dačynieńni da adnoj sa staličnych budaŭničych firm, karumpavany supracoŭnik finansavaj milicyi inicyjatyŭna prapanavaŭ zasnavalniku kamiercyjnaj struktury akazać dapamohu ŭ vyrašeńni niekatorych prablem. Svaje pasłuhi jon acaniŭ u 5.000 dołaraŭ, jakija nibyta pavinien byŭ pieradać supracoŭnikam DFR pa Minskaj vobłaści, jakija pravodzili pravierku.

Pry atrymańni pieršaj častki chabaru ŭ pamiery 2.500 dołaraŭ aficer byŭ zatrymany supracoŭnikami KDB.

Śledčym kamitetam u dačynieńni da jaho była raspačataja kryminalnaja sprava pavodle č. 5 art. 16 i č. 1 art. 431 KK (padbuchtorvańnie da davańnia chabaru).

Padčas śledstva stała viadoma, što bolšaść ašukanych supracoŭnikam DFR kamiersantaŭ — jaho blizkija siabry. Atrymanych ad ich hrošaj chapiła, kab zaviaršyć budaŭnictva dvuchpakajovaj kvatery. Padpałkoŭnik finansavaj milicyi ašukvaŭ nie tolki svaich siabroŭ, ale i kalehaŭ. Tak, jon zdavaŭ u arendu vydzielenuju Kamitetam dziaržkantrolu słužbovuju kvateru, dachody ad čaho jon nie dekłaravaŭ.

Sudom Zavodskaha rajona Minska ŭ dačynieńni da byłoha supracoŭnika DFR raspačaty razhlad kryminalnaj spravy.

U vyniku praviadzieńnia apieratyŭna-vyšukovych mierapryjemstvaŭ supracoŭnikami hrodzienskaha abłasnoha ŭpraŭleńnia KDB pry atrymańni chabaru ŭ pamiery 570 dołaraŭ zatrymany staršy inśpiektar pa orhanach unutranych spraŭ UDFR KDK pa Hrodzienskaj vobłaści padpałkoŭnik Ch.

Na praciahu 2011–2012 hadoŭ jon nieadnarazova atrymlivaŭ u jakaści chabaraŭ ad adnaho z žycharoŭ Hrodna roznyja tavarna-materyjalnyja kaštoŭnaści i hrašovyja srodki za vyrašeńnie pytańnia ab zaciahvańni śledstva i spynieńni rasśledavańnia raspačataj u dačynieńni da jaho kryminalnaj spravy. Čarhovy chabar za svaje «pasłuhi» jon zapatrabavaŭ u kamiersanta ŭ mai hetaha hoda.

Upraŭleńniem SK pa Hrodzienskaj vobłaści ŭ dačynieńni da staršaha inśpiektara 6 lipienia raspačata kryminalnaja sprava pa prykmietach złačynstva, praduhledžanaha č. 5 art. 16 i č. 1 art. 431 KK (padbuchtorvańnie da davańnia chabaru).

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH