Apošnim časam u Minsku zafiksavana bolš za dziasiatak adnatypovych kvaternych kradziažoŭ, achviarami jakich stanavilisia ludzi pažyłoha ŭzrostu.
Jak paviedamili ŭ HUUS Minharvykankama, złačynstvy mieli miesca ŭ Zavodskim, Leninskim, Pieršamajskim i Centralnym rajonach horada. Dziejničajuć złamyśniki arhanizavana, pa pradumanaj i dobra razyhranaj schiemie, pierad učynieńniem kradziažoŭ pravodziać tak zvanuju raźviedku i rekahnascyroŭku.
Va ŭsich vypadkach napiaredadni kradziažu ŭ kvatery achviar prychodzili smuhłyja žančyny (časam ź dziećmi) z prapanovaj niadoraha nabyć pradmiety paścielnaj bializny, rušniki abo adzieńnie.Mienavita ŭ hety čas i vybirałasia čarhovaja achviara. Hałoŭnym čynam tarhovak cikavili adzinokija piensijaniery. Pryhledzieŭšy abjekt, «raźviedčycy» zapaminali raźmiaščeńnie pakojaŭ, abstanoŭku ŭ kvatery, kali ŭdavałasia pradać
Viečaram hetaha ž dnia ci nazaŭtra ŭ vybranuju kvateru prychodziła jašče adna delehacyja. Adna, a čaściej dźvie žančyny, nazyvalisia supracoŭnikami Minhaza, abo rabotnikami sacyjalnych słužbaŭ, abo pradstaŭnikami rajonnych administracyj.U ich zadaču ŭvachodziła maksimalnaje adciahnieńnie ŭvahi sastarełaha čałavieka. Pry hetym pravierka hazavaha abstalavańnia abo prapanovy ab akazańni dapamohi adbyvalisia na kuchni, achviaru ž pavaročvali śpinaj da prychožaj abo inšych pakojaŭ. U hety momant u kvatery źjaŭlałasia jašče adna žančyna, jakaja i ŭčyniała kradziež. Złamyśnicy vydatna viedali ŭsie zacišnyja kutki, u jakich sastarełyja ludzi chavajuć svaje źbieražeńni. Jak praviła, na pošuki takich miescaŭ i kradziež išło 5–8 chvilin.
«U adnym z vypadkaŭ na vulicy Karastajanavaj dačasna pryjšła ŭnučka i zastała ŭsich troch niepasredna padčas kradziažu: dźvie žančyny „apracoŭvali“ sastarełuju haspadyniu na kuchni, a adna ŭ palčatkach abšukvała pakoj,— raskazvaje padrabiaznaści načalnik addzieła pa raskryćci kvaternych kradziažoŭ upraŭleńnia kryminalnaha vyšuku HUUS Minharvykankama Mikałaj Šybałka. — Hości adrazu ž acanili svajo krytyčnaje stanovišča i, skarystaŭšysia zamiašańniem maładoj dziaŭčyny, adšturchnuŭšy jaje, rynulisia da vychadu. Adyšoŭšy ad pieršaha šoku, dziaŭčyna paviedamiła ŭ milicyju, adnak zatrymać złamyśnic nie ŭdałosia, chutčej za ŭsio, ich čakała mašyna».
Z pačatku maja hetaha hoda ŭ stalicy zafiksavana 13 padobnych kradziažoŭ.Va ŭsich vypadkach achviary złačynstvaŭ — ludzi vielmi sastarełaha ŭzrostu, ad 75 da 87 hadoŭ. Złačyncy vykradali hrašovyja źbieražeńni abo juvielirnyja vyraby. Bolš za ŭsio vykradziena z kvatery pa vulicy Rajnisa — 8,5 młn. rubloŭ.
Ciapier supracoŭniki kryminalnaha vyšuku adšukvajuć złačynnuju hrupu, na jaje zatrymańnie aryjentujucca narady, jakija zastupajuć na słužbu. Milicyjaniery šukajuć troch smuhłych žančyn 40–50 hadoŭ z doŭhimi farbavanymi ŭ słavianskija kolery vałasami, siaredniaha rostu i ciełaskładu. Padčas znosin ź piensijanierami žančyny robiać pamietki ŭ školny tonki sšytak u kletačku.
