Užo nie raz havaryłasia, što Biełaruś maje patrebu ŭ pieraacency kadastravaha koštu ziamli, i narešcie dziaržaŭnaja mašyna zavarušyłasia.

— Rašeńnie ab pieraacency kadastravaha koštu ziamli Minska i Minskaha rajona ŭžo pryniataje miascovaj uładaj, ale jašče nie zakazanaje ŭ nas. Ciapier rychtujucca prajekty damovaŭ na rabotu pa praviadzieńni pieraacenki. Potym Nacyjanalnaje kadastravaje ahienctva pačnie pracu, vyniki jakoj pavinnaja budzie zaćvierdzić vykanaŭčaja ŭłada. Tamu dadzienaja pracedura zojmie jak minimum miesiac, bo heta nie prostaja pracedura, asabliva ŭ stalicy, — rastłumačyli ŭ Dziaržkammajomaści Biełarusi.

Varta adznačyć, što kali kadastravy košt ziamli paśla pieraacenki ŭźlacić uvierch, to ŭźlacić taksama i padatak na ziamlu, i arenda. Akramia taho, heta moža vyklikać padaražeńnie žyllovaha budaŭnictva, bo arenda ziamli zakładvajecca ŭ kaštarys padčas budaŭnictva.

Kadastravaja «invientaryzacyja» ziamiel pravodzicca ŭ Biełarusi raz na piać hadoŭ. Apošni raz hetaja pracedura vykonvałasia pa ŭsioj krainie ŭ 2010 hodzie. Vyklučeńnie tady skłali niekalki rajonaŭ, u tym liku i Minski.

Nahadajem, što kadastravy košt ziamli raźličvajecca ŭ zaležnaści ad uzroŭniu raźvićcia rynku nieruchomaści ŭ rehijonie, najaŭnaści infrastruktury i inšych paramietraŭ. Miž tym pry vystaŭleńni ziamli na aŭkcyjony vykankamy majuć prava pryznačać i svaju canu ŭ zaležnaści ad popytu na kankretny ziamielny ŭčastak.

Zrešty, da niadaŭniaha času startavaja cana ŭčastkaŭ na aŭkcyjonach pryznačałasia, jak praviła, zychodziačy ź jaje kadastravaha koštu. Ale ciapier vykankamy vyrašyli pierahledzieć svaju ziamielnuju palityku. U vyniku startavaja cana na niekatoryja ziamielnyja ŭčastki na aŭkcyjonie ŭ lipieni ŭžo vyrasła ŭ dva razy i bolš.

— Nijakich rezkich skokaŭ cen my nie nazirajem, — skazali ŭ ziemleŭparadkavalnaj słužbie Minabłvykankama.

I heta zrazumieła, bo košt padskočyŭ tolki na samyja zapatrabavanyja ŭčastki ziamli ŭ Minskaj vobłaści (Smalavicki rajon (ziamla kala Kurhana Słavy), Minski rajon (Baraŭlany) i h.d.). Heta abumoŭlena tym, što ziemleŭparadkavalnyja słužby sprabujuć adfiltravać zanadta vialikuju kolkaść ludziej, jakija žadajuć kupić učastki, a zaadno pazbavicca ad tych, chto, vykarystoŭvajučy prarechi ŭ zakanadaŭstvie, naŭmysna zryvaje aŭkcyjony. Jany padymajuć košt da toj miažy, pakul usie pretendenty nie zdaducca, a potym i sami admaŭlajucca ad kupli pry nastupnym kroku. Jak kažuć u narodzie, ni sabie ni ludziam. U vyniku aŭkcyjon pryznajecca niesapraŭdnym, i smačnyja ŭčastki ziamli miesiacami, a to i hadami zastajucca niepradadzienymi.

Pa stanie na 31 lipienia 2012 samyja darahija ŭčastki ziamli ŭ Minskim rajonie — heta prylehłyja da kalcavoj darohi (Baraŭlany, Ždanovičy, Sieńnica), startavy ceńnik na jakija dachodzić užo da 400 miljonaŭ rubloŭ.
Samyja tannyja ŭčastki ŭ Minskim rajonie možna znajści ŭ Juzufaŭskim i Haranskim sielsavietach, startavaja cana jakich pačynajecca ad 11 miljonaŭ rubloŭ.

Adnak pakul składana skazać, jak źmienicca situacyja paśla kadastravaj pieraacenki ziamli. Čynoŭniki nie vyklučajuć, što jana moža zastacca i ŭ miežach raniejšaha koštu, ale heta vielmi i vielmi małavierahodna, uličvajučy, što apošniaja pieraacenka rabiłasia až u 2005 hodzie, i za minułyja 7 hadoŭ inflacyja istotna adkarektavała košt nieruchomaści ŭ krainie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?