Biełaruś prapanoŭvaje Kitaju raźvivać supracoŭnictva ŭ kaśmičnaj śfiery. Pra heta zajaviŭ 6 žniŭnia Alaksandr Łukašenka na sustrečy z hienieralnym dyrektaram Kitajskaj karparacyi aerakaśmičnaj navuki i techniki Ma Sinžujem.

«My supracoŭničajem z Kitajskaj Narodnaj Respublikaj u hetaj śfiery ŭžo nie pieršy hod, i nie adzin hod, i dabilisia peŭnych pośpiechaŭ. Ale heta tolki pačatak,
— cytuje kiraŭnika biełaruskaj dziaržavy jaho pres-słužba. — U nas jašče bolš pierśpiektyŭ, my hatovy skarystacca vopytam Kitaja, dasiahnieńniami KNR u hetaj śfiery, i my hatovy prapanavać svaje pasłuhi Kitaju ŭ kaśmičnaj śfiery».
Łukašenka padkreśliŭ, što raźvićcio kaśmičnaj haliny maje važnaje značeńnie dla Biełarusi.
«My hetaj śfiery nadajom vialikaje značeńnie nie tolki tamu, što ŭ nas dobraja škoła i jość dastatkovaja kolkaść śpiecyjalistaŭ, ale jašče i tamu, što my nie myślim svaju nacyjanalnuju biaśpieku biez raźvićcia kaśmičnych technałohij», — skazaŭ jon.
Łukašenka źviarnuŭ uvahu na vysoki ŭzrovień uzajemarazumieńnia, jaki skłaŭsia ŭ adnosinach pamiž dźviuma krainami.
Na jaho dumku, heta sadziejničaje raźvićciu supracoŭnictva va ŭsich śfierach i na ŭsich kirunkach. «Heta tyčycca ŭ tym liku, a moža, siońnia ŭžo i pierš za ŭsio, takich prajektaŭ, jak kaśmičnaja halina, prajektaŭ u śfiery najvyšejšych technałohij», — skazaŭ Łukašenka.

U svaju čarhu hiendyrektar Kitajskaj karparacyi aerakaśmičnaj navuki i techniki Ma Sinžuj taksama pryznaŭ vysoki ŭzrovień supracoŭnictva dźviuch krain u kaśmičnaj śfiery i źviarnuŭ uvahu na dobruju jakaść biełaruskaha abstalavańnia ŭ hetaj śfiery, u pryvatnaści ŭ śfiery dystancyjnaha zandavańnia ziamli, jakoje było pieradadzienaje biełaruskim bokam Kitaju i prymianiajecca na kitajskich aparatach.

Ma Sinžuj vykazaŭ nadzieju na praciah plonnaha ŭzajemadziejańnia dźviuch dziaržaŭ. «Spadziajusia, supracoŭnictva ŭ kaśmičnaj śfiery vyjdzie na bolš vysoki ŭzrovień, kab prajekty raźvivalisia na karyść našych narodaŭ i z metaj mirnaha asvajeńnia kaśmičnaj prastory», — skazaŭ hiendyrektar.

Varta zaznačyć, što adzin ź pierśpiektyŭnych biełaruska-kitajskich prajektaŭ u kaśmičnaj śfiery — heta stvareńnie spadarožnika suviazi dla Biełarusi.

Nahadajem, jak paviedamiŭ žurnalistam 22 červienia staršynia Dziaržaŭnaha vajenna-pramysłovaha kamiteta Siarhiej Huruloŭ, čakajecca, što biełaruska-kitajski kantrakt na stvareńnie spadarožnika suviazi budzie padpisany sioleta.

Kantrakt pavinien być padpisany ź biełaruskaha boku Zavodam dakładnaj elektramiechaniki, z kitajskaha — karparacyjaj «Vialikaja ściana», jakaja vyjhrała tendar na stvareńnie spadarožnika.

Svaje prapanovy adnosna kantrakta biełaruski bok adpraviŭ kitajskamu «Eksimbanku», jaki paśla padpisańnia kantrakta pavinien adkryć kredytnuju liniju. Zhodna z kantraktam, paśla jaho padpisańnia spadarožnik pavinien być stvorany na praciahu troch hadoŭ. Praduhledžvajecca, što na arbitu jon budzie vyviedzieny kitajskim nośbitam.

Jak paviedamiŭ Huruloŭ, na praciahu šaści miesiacaŭ paśla zapusku budzie ažyćciaŭlacca sumiesnaja kantrolnaja ekspłuatacyja kaśmičnaha aparata, a potym kiravańnie im budzie pieradadziena biełaruskamu boku.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?