Heta pytańnie budzie abmiarkoŭvacca ŭ miežach pasiadžeńnia Miždziaržaŭnaj mižviedamasnaj rabočaj hrupy pa vypracoŭcy rekamiendacyj pa praviadzieńni ŭzhodnienaj mihracyjnaj palityki Sajuznaj dziaržavy, jakoje projdzie ŭ Minsku 7–8 žniŭnia.
Pavodle źviestak upraŭleńnia infarmacyi i hramadskich suviaziaŭ MUS Biełarusi, ekśpierty abmiarkujuć, u tym liku, pytańnie padrychtoŭki pahadnieńniaŭ, jakija praduhledžvajuć uzajemnaje pryznańnie rašeńniaŭ pra admovu va ŭjeździe na terytoryju Sajuznaj dziaržavy hramadzian trecich krain, a taksama abmien danymi pra asob, u dačynieńni da jakich dziejničajuć abmiežavańni na vyjezd.
Hetaj viasnoj pradstaŭniki biełaruskaj apazicyi, hramadzianskaj supolnaści i niedziaržaŭnych ŚMI pačali sutykacca z prablemaj vyjezdu z krainy ŭ zachodnim napramku.Na miažy im zajaŭlali, što jany ŭniesieny ŭ śpis asob, vyjezd jakich za miažu abmiežavany. Sutyknuŭšysia z takoj zabaronaj, mnohija vyjazdžali ŭ krainy Jeŭrasajuza praz terytoryju Rasii.
6 krasavika kiraŭnik pahraničnaj słužby RF Uładzimir Proničaŭ zajaviŭ žurnalistam: kali budzie daručeńnie zatrymać
«Funkcyi pahraničnych słužbaŭ zaklučajucca ŭ tym, što jany vykonvajuć zadačy adpaviednych instancyj, jakija praduhledžany miždziaržaŭnymi i mižviedamasnymi pahadnieńniami. Tamu, kali budzie daručeńnie pahraničnaj słužbie zatrymać tuju ci inšuju asobu, to jano budzie vykonvacca, na terytoryi Biełarusi ci na terytoryi Rasii. Ja tut prablem u našych uzajemaadnosinach absalutna nie baču. Pahraničniki ŭ poŭnym abjomie vykonvajuć usie tyja damoŭlenaści, jakija isnujuć», — zajaviŭ Proničaŭ.
Paśla hetaj zajavy rasijskija pravaabaroncy źviarnulisia da ŭpaŭnavažanaha pa pravach čałavieka RF Uładzimira Łukina, jaki paabiacaŭ im «nie zastavacca abyjakavym» da prablemy mahčymaha abmiežavańnia vyjezdu z Rasii biełaruskim apazicyjanieram.
Adnak, adznačyŭ jon, «prablema ŭ tym, što ŭpaŭnavažany zajmajecca pieršym čynam abaronaj pravoŭ rasijskich hramadzian, hramadzian, jakija žyvuć na terytoryi Rasii, i rasijskich hramadzian za miežami krainy». «Biełaruskija hramadzianie, jakija žyvuć u Biełarusi, ni da adnoj z hetych katehoryj nie adnosiacca. Tamu jurydyčna hetaj prablemaj upaŭnavažanamu ciažka zajmacca. Ale heta nie značyć, što ja zastanusia abyjakavym da hetaj prablemy», — skazaŭ ombudsmien.
Łukin paraiŭ pravaabaroncam «pracavać ź Ministerstvam zamiežnych spraŭ Rasii, kab MZS i inšyja ŭładnyja orhany, jakija zajmajucca hetaj prablemaj, zrazumieli, što heta niapravilna i supiarečyć unutranamu zakanadaŭstvu».
