7 žniŭnia śviatkuje svajo vaśmidziesiacihodździe doktar fiłałohii, prafiesar, stvaralnik i šmathadovy dyrektar Nacyjanalnaha navukova-aśvietnickaha centra imia Franciška Skaryny, hanarovy staršynia Mižnarodnaj asacyjacyi biełarusistaŭ, zasłužany dziejač polskaj kultury Adam Maldzis.
Jon naradziŭsia na Astravieččynie. Skončyŭ adździaleńnie žurnalistyki BDU, aśpiranturu pry Instytucie litaratury AN BSSR. Pracavaŭ niepraciahły čas u žurnalistycy, a potym ciaham amal paŭstahodździa — u akademičnym Instytucie litaratury.
Sp. Maldzis daśleduje historyju biełaruskaj kultury XVII–XVIII stst., biełaruska-polskija, biełaruska-litoŭskija i biełaruska-rasijskija litaraturnyja ŭzajemaŭpłyvy, prysutnaść biełaruskaj kultury ŭ śviecie, prablemy biełaruskaj dyjaspary.
A. Maldzis adkryŭ i ŭvioŭ u navukovy ŭžytak šmat imionaŭ i tvoraŭ biełaruskaha pryhožaha piśmienstva i inšych pomnikaŭ kulturnaj spadčyny, u tym liku zbornik piesień pieršaj pałovy XVII stahodździa, hetak zvany «Połacki sšytak». Łaŭreat Dziaržaŭnaj premii BSSR, maje litoŭskija i polskija ŭznaharody.
Aŭtar bolš jak dvuch dziasiatkaŭ manahrafijaŭ, litaraturaznaŭčych i kulturałahičnych ese, bijahrafičnaha narysu «Žyćcio i ŭźniasieńnie Uładzimira Karatkieviča», inicyjatar stvareńnia i redaktar šaścitamovaha bijabiblijahrafičnaha słoŭnika «Biełaruskija piśmieńniki».
***
Impreza «Słužeńnie jaje vialikaści ajčynnaj spadčynie», pryśviečanaja hetaj padziei, adbudziecca siońnia ŭ Dziaržaŭnym muziei historyi biełaruskaj litaratury (Minsk, vuł. Bahdanoviča, 13, Trajeckaje pradmieście). Pačatak a 16-j.
