U chodzie sprečak u Chamoŭnickim sudzie Maskvy prakuror Alaksandr Nikifaraŭ zapatrabavaŭ dla troch udzielnic hurta Pussy Riot Nadziei Tałakońnikavaj, Maryi Alochinaj i Kaciaryny Samucevič pa try hady kałonii ahulnaha režymu. Advakat paciarpiełych Łarysa Paŭłava padtrymała pradstaŭnika dziaržaŭnaha abvinavačańnia.
Napiaredadni zaviaršyłasia sudovaje śledstva pa spravie Pussy Riot, jakich abvinavačvajuć u praviadzieńni «pank-malebna» «Baharodzica, Pucina prahani!» ŭ chramie Chrysta Zbaŭcy ŭ Maskvie ŭ lutym 2012 hoda. U źniavoleńni dziaŭčaty praviali ŭžo amal paŭhoda.
Učora pra svaju maralnuju padtrymku Pussy Riot zajaviła suśvietnaja pop-zorka Madonna, što znachodzicca ŭ Maskvie ŭ ramkach hastrolnaha turu.«Ja vieru ŭ svabodu słova, i ja suprać cenzury, -- zajaviła Madonna. -- Ja spadziajusia, što dziaŭčaty nieŭzabavie buduć vyzvalenyja».
Raniej halivudski akcior Deni de Vita zaklikaŭ prezidenta Rasii Pucina vyzvalić udzielnic pank-hurta Pussy Riot. U padtrymku troch aryštavanych udzielnic pank-hurta napisali listy muzyki viadomych hrup - The Who, Pulp i Pet Shop Boys - Pit Taunsend, Džarvis Kokier i Nił Tenant.
Raniej u padtrymku Pussy Riot vykazvalisia Styvien Fraj, Tery Hilijam, Stynh, Red Hot Chili Peppers, Franz Ferdinand, Piter Hebryeł, Faith No More, Anti-Flag, Zola Jesus, Nina Chahien, Mark Ałmanda i Ed-Rok z Beastie Boys.
U kancy červienia kalektyŭny zvarot u sud z prośbaj vyzvalić udzielnic Pussy Riot padpisali rasijskija dziejačy kultury. Zvarot, u tym liku, padpisali Jaŭhienij Mironaŭ, Čułpan Chamatava, Barys Hrabienščykoŭ, Hryhoryj Čcharcišvili (Barys Akunin), Valeryj Mieładze, Aŭdoćcia Śmirnova, Eldar Razanaŭ, Andrej Śmirnoŭ, Michaił Žvaniecki dy inš.
