Adsiejali kožnaha čaćviortaha 2

Kandydatami ŭ deputaty pałaty pradstaŭnikoŭ, vybary jakich projduć 23 vieraśnia, zarehistravany 362 čałavieki, paviedamiła staršynia Centrvybarkama Lidzija Jarmošyna viečaram 23 žniŭnia ŭ efiry telekanała «Biełaruś-1».

Usiaho pretendentami ŭ kandydaty ŭ deputaty na 110 vybarčych akruh vyłučalisia 494 čałavieki.

Tydzień tamu Jarmošyna ŭ hutarcy z žurnalistami vykazała mierkavańnie, što kolkaść pretendentaŭ na deputacki mandat, jakim budzie admoŭlena ŭ rehistracyi, moža stać davoli značnaj. Takim čynam, u rehistracyi kandydatam u deputaty było admoŭlena kožnamu čaćviortamu pretendentu.

U bolšaści akruh rehistracyja kandydataŭ u deputaty adbyłasia 22 žniŭnia.

Rekamiendacyja pravieści rehistracyju kandydataŭ u adzin dzień zychodziła ad Centrvybarkama. Pavodle słoŭ Jarmošynaj, «zarehistravać usich kandydataŭ adnačasova nieabchodna, kab nichto nie havaryŭ, što chtości byŭ u niaroŭnych umovach dla praviadzieńnia ahitacyi». Padrabiaznaści ab vynikach rehistracyi kandydataŭ u deputaty Jarmošyna paviedamić na pres-kanfierencyi 24 žniŭnia.

Užo viadoma, što kandydatami ŭ deputaty zarehistravany 35 z 48 pretendentaŭ Abjadnanaj hramadzianskaj partyi, 30 z 33 — Partyi BNF. U

pryvatnaści, etap rehistracyi paśpiachova prajšli lidary Partyi BNF i AHP Alaksiej Janukievič i Anatol Labiedźka, byłyja deputaty parłamienta Valeryj Frałoŭ i Uładzimir Navasiad, namieśniki staršyni Partyi BNF Ryhor Kastusioŭ i Alaksandr Stralcoŭ.

Nie byli zarehistravany lidar ruchu «Za Svabodu» Alaksandr Milinkievič, pradstaŭnik kampanii «Havary praŭdu!» Michaił Paškievič, były staršynia Biełaruskaj sacyjał-demakratyčnaj partyi (Hramada) Anatol Laŭkovič i inšyja viadomyja apazicyjnyja palityki.

Pravodzić ahitacyjnuju kampaniju kandydat u deputaty moža z dnia rehistracyi. Pretendent na deputacki mandat maje prava za biudžetnyja srodki vyrabić ahitacyjnuju drukavanuju pradukcyju, vystupić pa telebačańni i radyjo, nadrukavać pieradvybarnuju prahramu. U vypadku zhody niekalkich kandydataŭ u deputaty, jakija bałatujucca pa adnoj akruzie, arhanizujucca debaty. Akramia taho, kandydaty ŭ deputaty mohuć sfarmiravać svaje asabistyja finansavyja fondy, srodki jakich možna budzie vykarystoŭvać na ahitacyjnuju kampaniju. Ahitacyjnaja kampanija budzie doŭžycca pa 22 vieraśnia ŭklučna.

Asnoŭny dzień hałasavańnia na vybarach deputataŭ pałaty pradstaŭnikoŭ — 23 vieraśnia. Da hetaha na praciahu piaci dzion budzie prachodzić daterminovaje hałasavańnie.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH