Biełaruskaja delehacyja na čale ź ministram architektury i budaŭnictva Anatolem Ničkasavym 23–30 žniŭnia naviedvaje ź vizitam Vieniesuełu i Ekvador.

Jak paviedamiła pres-słužba MZS Biełarusi, u Vieniesuele delehacyja praviadzie sustrečy z kiraŭnictvam MZS, a taksama ministerstvaŭ pramysłovaści, nafty i harnarudnaj pramysłovaści, žylla i žyłoj infrastruktury.

Vizit u Ekvador praduhledžvaje pieramovy z kiraŭnictvam Administracyi prezidenta, MZS, ministerstvaŭ haradskoha raźvićcia i žyllovaj haspadarki.

Asablivaja ŭvaha padčas pajezdki «budzie nadadziena realizacyi damoŭlenaściej, dasiahnutych u chodzie vizitu Alaksandra Łukašenki ŭ hetyja krainy», paviedamlaje pres-słužba MZS.

Treba adznačyć, što hetymi dniami ŭ Ekvadory vyrašajecca pytańnie ab ekstradycyi na radzimu byłoha biełaruskaha milicyjaniera Alaksandra Barankova, jaki pajechaŭ u hetuju krainu ŭ kastryčniku 2009 hoda, a letam 2010-ha atrymaŭ status palitbiežanca.
U Biełarusi Barankoŭ abvinavačvajecca ŭ machlarstvie, padbuchtorvańni da dačy chabaru i chabarnictvie. Sam jon śćviardžaje, što ŭ jaho jość dokazy ŭdziełu vysokapastaŭlenych biełaruskich čynoŭnikaŭ, u tym liku svajakoŭ Alaksandra Łukašenki, u kantrabandzie naftapraduktaŭ. U červieni hetaha hoda Barankoŭ byŭ zatrymany na padstavie zapytu biełaruskaha boku ab ekstradycyi.

Advakat Barankova śćviardžaje, što sprava palitbiežanca pryniała novy abarot paśla vizitu ŭ Ekvador u červieni hetaha hoda Alaksandra Łukašenki. Adnak dniami prezident Ekvadora Rafael Karea zajaviŭ, što zatrymańnie Barankova nie było praviedziena, kab dahadzić Łukašenku. Karea taksama zajaviŭ, što jaho paŭnamoctvy dazvalajuć admović u ekstradycyi, navat kali sud prymie rašeńnie viarnuć Barankova na radzimu. Razam z tym Karea adznačyŭ, što ličyć za lepšaje nie vykazvać svajho staŭleńnia da hetaj spravy da rašeńnia suda.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?