Pavodle vynikaŭ rehistracyi kandydataŭ u deputaty Pałaty pradstaŭnikoŭ z zajavaj vystupiŭ staršynia Libieralna-demakratyčnaj partyi Biełarusi Siarhiej Hajdukievič.

«Paŭhoda ŭ internecie i srodkach masavaj infarmacyi išła dyskusija na pradmiet bajkatavańnia ci ŭdziełu ŭ vybarach, prapanoŭvalisia raznastajnyja varyjanty — a my maŭčali i čakali, — adznačaje Hajdukievič. — Niekatoryja zajaŭlali, što zarehistrujucca, a potym źnimucca za 5 dzion da vybaraŭ, niekatoryja rekłamavali, jak jany šalona i burna buduć pravodzić bajkot.

U vyniku — nul! Bajkotu niama, kandydataŭ u deputaty zarehistravali nikčemnuju kupku.
A zaraz nadyšoŭ čas abviaścić, što ciapier budzie rabić Libieralna-demakratyčnaja partyja».

Pavodle aficyjnych źviestak, ŁDP udałosia zarehistravać bolš jak 70 kandydataŭ u deputaty. «Kožnamu zarehistravanamu kandydatu dla vyrabu ahitacyjnych drukavanych materyjałaŭ vydzialajecca 50 bazavych vieličyń, što składaje 5.000.000 biełaruskich rubloŭ. Niaciažka padličyć, jakuju kolkaść ulotak zmoža vyrabić Libieralna-demakratyčnaja partyja z usimi svaimi zarehistravanymi kandydatami, heta 2.500.000 drukavanaha materyjału», — padkreśliŭ palityk.

Dla kožnaha kandydata ŭ deputaty ad ŁDP partyja padrychtavała «adzinuju adozvu, adzinuju ŭlotku», u jakoj źmieščany zvarot lidara partyi i kandydata ŭ deputaty da vybarščykaŭ.
«Uvieś hety vielizarny abjom ahitacyjnaha materyjału budzie raspaŭsiudžany pa ŭsioj krainie, kab nas pačuli ŭ kožnym domie, u kožnaj kvatery, u kožnym kutku rodnaj Biełarusi, z metaj danieści da kožnaha vybarščyka našu pazicyju, najaŭnaje stanovišča ŭ krainie. Mienavita tak treba rabić usim tym, chto nie viedaŭ i nie razumieŭ, što i jak treba rabić», — zajaviŭ Hajdukievič.

Pavodle jaho mierkavańnia, heta biesprecedentny vypadak u historyi vybaraŭ, mahčymaść vyrabu vielizarnaj kolkaści ŭlotak, «navat kali ŭziać try prezidenckija kampanii».

«Libieralna-demakratyčnaja partyja śviatkuje svaju pieramohu, jakuju jana moža pravieści ŭ žyćcio, i vinšuje z hetym usich hramadzian Respubliki Biełaruś, tamu što my ŭpeŭnieny, što kožny nas zrazumieje i pačuje», — adznačyŭ palityk.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?