Praciahłaść kansultacyj kirhizskaha pasła ŭ Biełarusi budzie zaležać ad pazicyi biełaruskaha boku, zajaviŭ žurnalistam 27 žniŭnia ŭ Minsku savietnik pasolstva Kyrhyzstana Dźmitryj Li.

Žurnalistaŭ sabrali dla taho, kab rastłumačyć situacyju vakoł adsutnaści ŭ Biełarusi pasła Kyrhyzstana Eryka Asanalijeva i supiarečlivyja paviedamleńni adnosna jaho adklikańnia na kansultacyi ŭ Biškiek, što źjavilisia ŭ ŚMI.

«Kab paźbiehnuć roznych interpretacyj u hetym pytańni ja ŭpaŭnavažany zajavić, što Asanalijeŭ adklikany ŭ Biškiek dla praviadzieńnia kansultacyj u suviazi ź situacyjaj adnosna znachodžańnia Žanybieka Bakijeva na terytoryi Respubliki Biełaruś», — skazaŭ savietnik.

Jon udakładniŭ, što pasoł byŭ adklikany 24 žniŭnia.

Pavodle słoŭ Dźmitryja Li, takaja miera pryniata «ŭ suviazi z adsutnaściu reakcyi kampietentnych orhanaŭ biełaruskaha boku na vierbalnuju notu ad 21 žniŭnia i zajavu MZS Kyrhyzstana ad 22 žniŭnia adnosna znachodžańnia hramadzianina Kyrhyzstana Žanybieka Bakijeva na terytoryi Respubliki Biełaruś, jakoha adšukvajuć pravaachoŭnyja orhany Kyrhyzstana i Interpoł za ŭčynienyja raniej asabliva ciažkija kryminalnyja złačynstvy».

Kirhizski bok spadziajecca na toje, što biełaruskija ŭłady «ŭsio-taki prymuć vyčarpalnyja miery pa nieadkładnym zatrymańni i ekstradycyi Žanybieka Bakijeva ŭ Kyrhyzskuju Respubliku ŭ miežach dziejnych mižnarodnych dahavoraŭ, udzielnikami jakich źjaŭlajucca jak Kyrhyzstan, hetak i Biełaruś»,

padkreśliŭ savietnik pasolstva.

***

    Nahadajem, abjaŭleny ŭ mižnarodny vyšuk Žanyš Bakijeŭ, brat skinutaha prezidenta Kurmanbieka Bakijeva, niadaŭna byŭ zaŭvažany i sfatahrafavany ŭ centry Minska ź jašče dvuma padazronymi ŭ trajnym zabojstvie. Zdymak zrobleny vidavočcami kala kafe «Hrunvald» na vulicy Karła Marksa, niepadalok ad Administracyi prezidenta Respubliki Biełaruś.
    «Na im sfatahrafavanyja hramadzianie Kyrhyzskaj Respubliki, abjaŭlenyja ŭ miždziaržaŭny vyšuk, — były staršynia Słužby dziaržachovy Žanyš Bakijeŭ, a taksama jaho adnakurśnik i eks-namieśnik SDA Tachir Rysalijeŭ, 1957 hoda naradžeńnia, uradženiec Narynskaj vobłaści, i Rustam Sajdujeŭ, 1976 hoda naradžeńnia, uradženiec Džałał-Abadskaj vobłaści, blizki siabar Maksima Bakijeva», — paviedamiła hałoŭnaje ŭpraŭleńnie kryminalnaha vyšuku (HUKV) MUS Kyrhyzstana.
    Pavodle źviestak HUKV, usie troje źjaŭlajucca asnoŭnymi padazronymi ŭ zabojstvie byłoha kiraŭnika Administracyi prezidenta Kyrhyzstana Miedeta Sadyrkułava, jaho vadziciela Kubata Sułajmanava i dyrektara Mižnarodnaha instytuta stratehičnych daśledavańniaŭ Siarhieja Ślepčanki. Paviedamlajecca taksama, što kiraŭnictva HUKV MUS «niekalki razoŭ nakiroŭvała zapyt u pravaachoŭnyja orhany Biełarusi ab miescaznachodžańni asob, jakija adšukvajucca, i kožny raz atrymlivała adkaz, što źviestak pra hetych asob niama».
    22 žniŭnia MZS Kyrhyzstana vykazała nieŭrazumieńnie i zaniepakojenaść u suviazi z publikacyjami ŭ srodkach masavaj infarmacyi fatahrafij Žanybieka Bakijeva, što paćviardžajuć jaho znachodžańnie na terytoryi Biełarusi.
    «Kampietentnyja orhany Kyrhyzskaj Respubliki nieadnarazova źviartalisia ŭ dziaržaŭnyja orhany Respubliki Biełaruś z prośbaj ab pryniaćci mier pa realizacyi abaviazacielstvaŭ, pryniatych na siabie biełaruskim bokam zhodna z Kanviencyjaj ab pravavoj dapamozie i pravavych adnosinach pa hramadzianskich, siamiejnych i kryminalnych spravach i inšych mižnarodnych dahavorach», — havaryłasia ŭ zajavie MZS.
    «Na vialiki žal, Hienieralnaja prakuratura Respubliki Biełaruś stała na šlach apraŭdańnia Žanybieka Bakijeva i kvalifikavała vidavočnyja kryminalnyja złačynstvy jak „pieraśledy pa prykmiecie palityčnych pierakanańniaŭ“. Kirhizski bok zaniepakojeny tym, što Ž.Bakijeŭ svabodna pieramiaščajecca pa terytoryi Respubliki Biełaruś, jakaja źjaŭlajecca družalubnaj krainaj i ŭdzielnicaj vyšejzhadanaj kanviencyi, a taksama inšych mižnarodnych dahavoraŭ», — zajaviła MZS Kyrhyzstana.
    24 žniŭnia pres-słužba kirhizskaha MZS paviedamiła pra adklikańnie pasła Asanalijeva ź Minska. U toj ža dzień dziaržaŭnaje ahienctva BiełTA sa spasyłkaj na pasolstva Kyrhyzstana ŭ Minsku abvierhła infarmacyju pra adklikańnie pasła.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?