Padpisany statut i ŭstanoŭčyja dakumienty kitajska-biełaruskaj parka ŭ Smalavičach

U Ministerstvie ekanomiki 27 žniŭnia adbyŭsia schod zasnavalnikaŭ kitajska-biełaruskaha sumiesnaha zakrytaha akcyjaniernaha tavarystva «Kampanija pa raźvićci industryjalnaha parka», paviedamili ŭ pres-słužbie viedamstva.

Baki ŭ prysutnaści ministra ekanomiki Mikałaja Snapkova i staršyni Minskaha abłvykankama Barysa Batury zaćvierdzili statut stvaranaha tavarystva i ŭstanoŭčyja dakumienty. Dakumienty padpisali namieśnik staršyni Minskaha abłvykankama Alaksandr Jarmak, hienieralny dyrektar AAT «Kiraŭnickaja kampanija chołdynhu «Haryzont» Juryj Pradko i staršynia praŭleńnia — hienieralny dyrektar kampanii SAMSIE Ło Jań.

«Padčas schodu baki taksama akreślili kankretnyja zadačy pa dalejšaj realizacyi ŭ Smalavickim rajonie (Minskaja vobłaść) maštabnaha prajekta — kitajska-biełaruskaha industryjalnaha parka», — zaznačyła pres-słužba.

Stvaranaja z udziełam AAT «Kitajskaja karparacyja inžynirynhu SAMS», Minskaha abłvykankama i AAT «Kiraŭnickaja kampanija chołdynhu «Haryzont» kampanija budzie ažyćciaŭlać prajektavańnie, budaŭnictva abjektaŭ parka i jaho infrastruktury,

a taksama pošuk i pryciahnieńnie inviestaraŭ dla stvareńnia na jaho terytoryi vysokatechnałahičnych i kankurentazdolnych vytvorčaściaŭ.

Realizacyja prajekta kitajska-biełaruskaha industryjalnaha parka ažyćciaŭlajecca ŭ adpaviednaści z ukazam prezidenta ad 5 červienia 2012 hoda № 253. Park ujaŭlaje saboj administracyjna-terytaryjalnaje ŭtvareńnie płoščaj prykładna 80 kvadratnych kiłamietraŭ z asablivym pravavym režymam dla «zabieśpiačeńnia kamfortnych umoŭ viadzieńnia biźniesu i inviestycyjnaj pryciahalnaści». Kancepcyja parka praduhledžvaje stvareńnie zručnaj infrastruktury dla raźvićcia biźniesu, istotnaje padatkovaje pasłableńnie dla ŭdzielnikaŭ prajekta na dastatkova praciahły pieryjad, a taksama zabieśpiačeńnie kompleksnaha absłuhoŭvańnia rezidentaŭ parka i akazańnie im dziaržaŭnych pasłuh na pryncypie «adna stancyja» (u suśvietnaj praktycy — one-stop service).

Nahadajem, miascovyja žychary vystupajuć suprać budaŭnictva industryjalnaha parka. Jak paviedamiła na pres-kanfierencyi 11 maja žycharka pasiołka Ziamnoje Valancina Kalaka, pad technapark traplajuć ziemli sadavodčych tavarystvaŭ, voryŭnyja ziemli, u tym liku i jaje ziamla, jakuju jana ŭ svoj čas pryvatyzavała. «A tak nas pradali, i ŭ nas nijakich pravoŭ niama. My prosta abaraniajem svaju ŭłasnaść», — skazała jana. «Heta naša ŭłasnaść, i jana pavodle Kanstytucyi achoŭvajecca zakonam. Nichto nie moža pradać maju ŭłasnaść biez majoj zhody», — zajaviła Kalaka.

Staršynia sadavodčaha tavarystva «Suzorje» Juryj Kabzaroŭ zaznačyŭ, što na miescy budaŭnictva znachodziacca nie tolki voryŭnyja ziemli, ale i zakaźniki, lasy, pijanierskija łahiery i pryrodaachoŭnyja zony. «Naš prezident skazaŭ, što ŭ Biełarusi kryŭdzić ludziej nielha i što ŭ nas dastatkova terytoryi, na jakoj možna raźmiaścić hety park. I my prosim našych kiraŭnikoŭ pravilna padyści da hetaha pytańnia. My chočam, kab i našy intaresy ŭličvalisia. Zhodna z Kanstytucyjaj, krynicaj ułady źjaŭlajecca narod. Heta značyć, pavodle Kanstytucyi, my — haspadary krainy», — zajaviŭ Kabzaroŭ.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH