Niekatoryja ŚMI paviedamili, što Ministerstva adukacyi razhladaje mahčymaść likvidacyi Fakulteta mižnarodnych adnosinaŭ BDU. Kali fakultet budzie začynieny, chto budzie rychtavać dyplamataŭ dla Biełarusi?
U kastryčniku 1995 hodu na bazie adździaleńniaŭ «mižnarodnyja adnosiny», «mižnarodnaje prava» i «mižnarodnyja ekanamičnyja adnosiny» histaryčnaha, jurydyčnaha i filazofska‑ekanamičnaha fakultetaŭ Biełdziaržuniversytetu stvaryli fakultet mižnarodnych adnosinaŭ. Sioletniaj vosieńniu spoŭnicca 10 hadoŭ, jak studenty pačali zajmacca ŭ asobnym budynku.
Infarmacyja pra mahčymuju likvidacyju fakulteta mižnarodnych adnosinaŭ źjaviłasia sa spasyłkaj na čynoŭnikaŭ Ministerstva adukacyi. Hetyja čynoŭniki, imia jakich u medyjach nie nazyvajecca, padkreślivajuć, što inicyjatyva sychodzić ad administracyi prezydenta.
Namieśnica načalnika Upravy perspektyŭnaha raźvićcia i analityčnaj pracy BDU Volha Ščadryna kaža, što nia moža adkazvać za plany svajho kiraŭnictva. Adnak, zapeŭnivaje jana, sioleta nijakich radykalnych źmienaŭ u pracy fakultetu mižnarodnych adnosinach nie planujecca.
Ščadryna: «Abvieščany nabor, abituryjenty viedajuć, što taki fakultet isnuje i na jaho ŭ hetym hodzie buduć nabiracca studenty. A što budzie kaliści – budziem bačyć. Sami viedajecie, što ŭsio moža być. Voś heta dakładna mahu skazać nakont ahučanaj raniej infarmacyi. A što da ŭsiaho astatniaha, to pakul u nas nijakich źviestak niama».
Na fakultecie mižnarodnych adnosinaŭ navučajucca 2 tysiačy studentaŭ, padvyšajuć kvalifikacyju bolš za paŭsotni mahistrantaŭ, aśpirantaŭ i daktarantaŭ. Aproč biełarusaŭ, tearetyčnuju i praktyčnuju padrychtoŭku atrymlivajuć 150 navučencaŭ z 20 krain śvietu.
U 2006‑m hodzie na biudžetnuju formu navučańnia nabrali 145 čałaviek, a na płatnuju ŭdvaja bolej ‑‑ 330.
Fakultet zakončyli i dva syny Alaksandra Łukašenki – Viktar i Źmicier
Da momantu abrańnia deputatam Viarchoŭnaha Savietu 13‑ha sklikańnia Pavał Znaviec vykładaŭ na fakultecie dyscyplinu «Mižnarodnaje prava» i speckurs «Dyplamatyčnaje i konsulskaje prava». Spadar Znaviec pierakanany: sensu ŭ likvidacyi fakultetu niama.
Znaviec: «Lišnich kadraŭ nie byvaje. Tym bolš, uzrovień adukacyi, uzrovień studentaŭ tam vielmi vysoki. U hrupie, dzie vučyŭsia starejšy syn Łukašenki Viktar, za vyklučeńniem taho, što jon byŭ słabieńki dy jašče adzin‑dva studenty, astatnija byli vielmi vysokaha uzroŭniu. Tamu pryčyny likvidacyi mohuć być inšyja. Toj ža budynak, prykładam. Ale takoha ŭzroŭniu vypuskniki lohka znojduć pracu ŭ luboj firmie ci za miažoj (usie, darečy, ‑‑ ź viedańniem dvuch zamiežnych movaŭ)»
Karniej: «Kažuć, što fakultet ledźvie nie na siem hadoŭ napierad narychtavaŭ specyjalistaŭ...»
Znaviec: «Nakont siami hadoŭ napierad ničoha skazać nie mahu. Tamu što, u pryncypie, ludzi adychodziać u inšy śviet, na ich miesca musiać pryjści novyja kadry. Adychodziać taksama na pensiju dyplamaty. Tamu tut niešta praličvać ciažka. A što tady, praź siem hadoŭ, znoŭ adkryvać ustanovu? Ja dapuskaju, što dla takoj krainy jak Biełaruś dastatkova było i adździaleńnie mižnarodnych adnosinaŭ na tym ža jurfaku. Ale kali ŭžo fakultet byŭ stvorany, to možna paralelna tam rychtavać kadry nia tolki dla źniešniepalityčnaha viedamstva, ale i dla inšych struktur, jakija majuć stasunki na mižnarodnym uzroŭni».
Kanstancin Chadyka skončyŭ fakultet mižnarodnych adnosinaŭ BDU pry kancy 1990‑ch. Jahonym adnakurśnikam byŭ zhadany ŭžo Viktar Łukašenka. Niepraciahły čas paśla hetaha pracavaŭ pavodle atrymanaj specyjalnaści ŭ dziaržaŭnaj ustanovie, potym zaniaŭsia arhanizacyjaj skaŭckaha ruchu.
Spadar Chadyka sumniajecca, što prestyžny fakultet moža być źlikvidavany.
Chadyka: «Pry likvidacyi takoha fakultetu paŭstanie pytańnie: dzie budzie vučycca nastupnaje pakaleńnie biełaruskaj namenklatury? Tamu ja nia vieru, što budzie niejkaja rearhanizacyja. Sam pa sabie fakultet, biezumoŭna, patrebien. Inšaja sprava, što jon patrebien krainie, jakaja maje nieabchodnaść u dyplamatyčnych kadrach. Pakul mnie padajecca, što navat tyja aficyjnyja asoby, jakija pracujuć na MZS, nia mohuć dakładna patłumačyć, jakaja ŭ nas mižnarodnaja kancepcyja. Najpierš, voś hetaje «dałučeńnie da ruchu niedałučeńnia» (što samo pa sabie dziŭna hučyć). I tut ža zajavy pra sajuz z Rasiejaj. Mnie padajecca, što hetaha nichto nie razumieje, bo heta rečy, jakija nie stasujucca pamiž saboj. Što datyčna «apazycyjnaści» fakultetu, to apošnim časam mažlivaść manitorynhu nastrojaŭ u asiarodku studentaŭ adsutničaje. Tam vučycca mo jaki tuzin ludziej ź viadomymi proźviščami. Ale znoŭ ža sumniajusia, što niejkija kroki ŭ refarmavańni buduć adbyvacca mienavita z‑za hetaha».
