«Infarmacyi ab tym, što padzieja (sustreča rasijskaha apazicyjaniera Siarhieja Udalcova i hruzinskaha palityka Hivi Tarhamadze) była ŭ Biełarusi, u Minsku, my nie majem i paćvierdzić nie možam»,
— zajaviŭ BiełaPAN načalnik centra infarmacyi i hramadskich suviaziaŭ Kamiteta dziaržbiaśpieki Alaksandr Antanovič. Takim čynam jon prakamientavaŭ słovy lidara «Druhoj Rasii» Eduarda Limonava ab tym, što KDB Biełarusi pa-siabroŭsku padzialiŭsia sa svaimi kalehami ŭ Maskvie zapisam sustrečy apazicyjaniera Udalcova i Tarhamadze.
«Kali havaryć movaj śpiecsłužbaŭ, havorka moža iści pra dvurušnictva ŭdzielnikaŭ hetaj sustrečy. Chtości ź ich akazaŭsia niačystym na ruku», — skazaŭ Antanovič.

Napiaredadni Eduard Limonaŭ prakamientavaŭ vobyski ŭ kvatery Siarhieja Udalcova i raspačynańnie Śledčym kamitetam kryminalnaj spravy ŭ dačynieńni da jaho.

«Vyśvietliłasia, što sustrakalisia jany (Udalcoŭ i Tarhamadze) u Minsku. Ja raniej vykazvaŭ mierkavańnie, što sustrakalisia va Ukrainie, heta amal što, ale nie adno i toje ž.

KDB Respubliki Biełaruś mnie znajoma, niejak traplaŭ da ich u łapy nienadoŭha, jašče ŭ 1990-ja. Ničoha dobraha.
Zaraz ja schilny vykazać mierkavańnie, što heta minski KDB zapisaŭ na ŭsiaki vypadak sustreču zamiežnych hramadzian na svajoj terytoryi i pa-siabroŭsku zatym pierapraviŭ zapis svaim kaleham u Maskvie, a tyja prapanavali NTV zrabić film», — napisaŭ Limonaŭ u svaim błohu ŭ ŽŽ, pieradavaŭ Rosbałt.

Apazicyjanier adznačaje, što «ni na jakuju surjoznuju zmoŭnickuju dziejnaść hety čałaviek nie padychodzić».

«U jaho niama dla hetaha ni ćviordaści charaktaru, niama patrebnaj aściarožnaści, niama adpaviednych kadraŭ, jaho adzinym, za paŭtara dziesiacihodździa jaho isnavańnia ŭ apazicyi, mietadam palityčnaha isnavańnia byŭ praryŭ paśla mitynhu praz ačapleńnie milicyi. Kudy praryŭ, čaho praryŭ było jamu, vidać, nie važna, važny byŭ fakt praryvu, kab potym napisali ŭ ŚMI: „Udalcoŭ z hrupaj tavaryšaŭ pasprabavaŭ prarvacca“. Hetym jon zajmaŭsia pry Anpiłavie, a praz paŭtara dziesiacihodździa na Bałotnaj… Naplavuzhaŭ, voś ciapier nacierpicca», — zaklučyŭ Limonaŭ.
Raniej stała viadoma, što SK RF raspačaŭ kryminalnuju spravu u dačynieńni da kaardynatara «Levaha frontu» Siarhieja Udalcova i inšych asob paśla pravierki faktaŭ ź filma «Anatomija pratestu — 2», jaki vyjšaŭ na kanale NTV 5 kastryčnika.
U im aŭtary raskryvajuć schiemu finansavaj padtrymki rasijskaj pazasistemnaj apazicyi. U pryvatnaści, u filmie śćviardžajecca, što apazicyjaniery płanavali ažyćciavić siłavy zachop ułady na hrošy z-za miažy. Tam ža jość videa, na jakim Udalcoŭ nibyta hutaryć z kiraŭnikom parłamienckaha kamiteta Hruzii pa abaronie i biaśpiecy Hivi Tarhamadze, u jakoha, jak adznačajecca, jość vopyt «kalarovych revalucyj».

Udalcoŭ paviedamiŭ, što čałaviek pa imieni Hivi Tarhamadze jamu nieviadomy i jon ź im nikoli nie sustrakaŭsia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?