Aleś Bialacki prasiŭ polskich dypłamataŭ nie pieradavać Minsku infarmacyju pra jaho rachunki ŭ Polščy, na jakich byli srodki dla dziejnaści zakrytaha biełaruskimi ŭładami pravaabarončaha centra «Viasna». Pra heta piša polskaja Rzeczpospolita.

Pavodle źviestak haziety, u červieni 2011 hoda Bialacki asabista prychodziŭ u pasolstva Polščy i prasiŭ nie pieradavać hetuju infarmacyju biełaruskamu boku. Fakt vizitu paćvierdzili žonka Bialackaha Natalla Pinčuk i jaho kaleha Valancin Stefanovič.

Vydańnie zaznačaje, što Bialackaha ŭ pasolstvie zapeŭnili: pieradača ŭ Minsk infarmacyi ab rachunkach niemahčymaja i pra situacyju budzie paviedamlena ministru zamiežnych spraŭ Polščy Radasłavu Sikorskamu.

U svaju čarhu pres-sakratar MZS Polščy Marcin Basacki zajaviŭ Rzeczpospolita, što Sikorski nie atrymlivaŭ takoj infarmacyi. Basacki taksama admoviŭsia paćvierdzić, ci sustrakalisia polskija dypłamaty ŭ Minsku ź Bialackim. «My nie možam infarmavać pra mahčymyja kantakty našych dypłamataŭ ź biełaruskimi apazicyjanierami, asabliva z tymi, chto, jak Aleś Bialacki, znachodziacca ŭ turmie», — skazaŭ jon.

Pres-sakratar Hienieralnaj prakuratury Polščy Mateuš Martyniuk zaznačyŭ, što ni sam Sikorski, ni chtości inšy z supracoŭnikaŭ MZS nie papiaredžvali hienieralnaha prakurora Andžeja Šaramieta pra niejkija asablivaści ŭ vypadku ź Bialackim.

Martyniuk zaŭvažyŭ, što razmova pamiž Sikorskim i Šaramietam adbyłasia ŭžo paśla taho, jak źviestki pra rachunki byli pieradadzieny ŭ Minsk.

Nahadajem, vice-prezident Mižnarodnaj fiederacyi pravoŭ čałavieka, kiraŭnik pravaabarončaha centra «Viasna» Aleś Bialacki abvinavačany va ŭtojvańni dachodaŭ u asabliva bujnym pamiery. U listapadzie 2011 hoda sud pryhavaryŭ jaho da čatyroch z pałovaj hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Padstavaj dla kryminalnaha pieraśledu Bialackaha stała najaŭnaść u jaho rachunkaŭ u bankach Litvy i Polščy. Sud nie ŭličyŭ toje, što hrošy, jakija pastupali na hetyja rachunki, vykarystoŭvalisia dla pravaabarončaj dziejnaści. Nie byŭ uziaty pad uvahu i toj fakt, što ŭron, jaki, pavodle viersii suda, nanios Bialacki, byŭ poŭnaściu pahašany za košt dobraachvotnych achviaravańniaŭ biełaruskich hramadzian.

Aryšt Bialackaha vyklikaŭ šyroki rezanans. Jon abvieščany viaźniem sumleńnia, jaho vyzvaleńnia patrabuje mižnarodnaja demakratyčnaja hramadskaść, kiraŭnictva Jeŭrasajuza i ZŠA.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?