Ranicaj u 10 hadzin Barys Chamajda vystaviŭ pikiet u centry Viciebsku, kala ŭvachodu ŭ kramu, jakaja mieścicca ŭ «Sinim domie». Zvyčajna hetym miescy Barys Chanonavič raspaŭsiudžvaje niezaležnuju presu. Siońnia ž jon ustalavaŭ nievialički zvon z płakatam «Paminalny zvon pa achviarach Čarnobyla», u jaki raz‑poraz zvaniŭ.
Adnak amal adrazu na miesca pikieta prybyli milicyjanty, a praź niekatory čas i supracoŭniki pałka milicyi śpiecyjalnaha pryznačeńnia. Taksama źjaviłasia šmat nieviadomych asobaŭ u cyvilnym, jakija sprabavali błakavać žurnalistaŭ i zakryvali abjektyvy fotaapparataŭ. U 10:16 Barysa Chamajdu pahruzili ŭ milicejski mikraaŭtobus i pavieźli ŭ Čyhunačny RAUS Viciebska.
Pa apošnich źviestkach Barysa Chamajdu asudzili na 2 sutak administratyŭnaha aryštu.
U žałobnaj akcyi, jakuju siońnia pravioŭ Barys Chamajda, varta adznačyć adzin admietny momant. Apazicyjanier padčas svajoj akcyi stajaŭ śpinoj da vitryny kramy «Viesta». I jakraz u toj čas, kali jon biŭ u žałobny zvon pa achviarach Čarnobyla, słužačyja kramy vyviešvali za škłom płakat sa słovami «Vinšujem sa śviatam!». Było bačna, što jany vielmi imknulisia pryhoža azdobić vitrynu: staranna drapiravali čyrvonuju tkaninu, papraŭlali płakat…
Niaciažka zdahadacca, čto hety «dekor» prymierkavany da nabližajučahasia dziaržaŭnaha Śviata pracy, što adznačajecca 1 traŭnia. Kaniešnie ž, u dumkach supracoŭnikaŭ kramy nie było ničoha drennaha. Ale ž vinšavalny płakat i žałobny zvon dla starońnich naziralnikaŭ vyhladali žachlivym dysanansam. Kali nie skazać — ździekam… Adna dziaŭčyna prajšła mima, tady viarnułasia i sfatahrafavała heta na mabilnik. U sučasnych biełaruskich realijach časta susiedničajuć katastrofy i śviaty, trahiedyi i ŭračystaści.
Jašče da zatrymańnia Barys Chamajda tak patłumačyŭ sens svajoj akcyi: «Ja chaču nahadać ludziam, što Čarnobyl jość i siońnia, niahledziačy na toje, što prajšoŭ 21 hod. Tym bolš, što zaraz havorać ab budaŭnictvie novaj AES, u nas — u Biełarusi, choć my jašče nie likvidavali nastupstvy toj katastrofy».
U hety ž dzień nad zatrymanym adbyŭsia sud. Jahony vyrak za nieviadoma jakuju pravinu — dvoje sutak u izalatary časovaha ŭtrymańnia.