Tłumačeńni brali tamu, što ŭ Hrodna sa Śvisłačy pryjšoŭ rapart, pavodle jakoha Kirkievič 27 kastryčnika braŭ udzieł u niesankcyjanavanym mierapryjemstvie.

Tłumačeńni ŭ Kirkieviča braŭ kapitan Pavał Łapato, namieśnik načalnika Leninskaha RAUS Hrodna. Pavodle Kirkieviča, jon admoviŭsia adkazvać na kankretnyja pytańni, ale patłumačyŭ, što 27 kastryčnika braŭ udzieł va ŭšanavańni pamiaci paŭstancaŭ 1863 hoda.

27 kastryčnika ŭ Śvisłačy ludzi z roznych haradoŭ Biełarusi tradycyjna adznačali pamiać paŭstancaŭ Kalinoŭskaha. Demakratyčnyja aktyvisty ŭskłali kvietki na mahiłu Viktara Kalinoŭskaha, da pomnikaŭ Kastusiu Kalinoŭskamu i Ramualdu Traŭhutu, naviedali radzimu Kalinoŭskich — siadzibu Jakušoŭka.

U toj dzień milicyjanty zatrymali ŭ Śvisłačy 4-ch maładych ludziej, skłali pratakoły za ŭdzieł u niesankcyjanavanaj akcyi i vykarystańni niezarehistravanaj simvoliki, a paźniej usich asudzili: Stanisłava Husakova ź Viciebska i Aleś Krot ź Minska, Vitold Ašurka ź Biarozaŭki atrymali pa 3 sutak aryštu, haradzieniec Vital Łopasaŭ — štraf u pamiery 3 miljonaŭ rubloŭ.

Dniami pozvy ŭ sud atrymali demakratyčnyja aktyvisty sa Śvisłačy Anatol Valuk — sud adbudziecca 26 listapada, Jury Hlebik i Viktar Dziasiacik — ich buduć sudzić 27 listapada. Pierad hetym milicyjanty prychodzili da ich taksama brać tłumačeńni. Ich vinavaciać va ŭdziele ŭ niesankcyjanavanaj akcyi.

Aleś Kirkievič miarkuje, što ŭ chutkim časie jamu taksama mohuć dasłać pozvu sa Śvisłackaha suda, hetaksama jak i Valuku, Hlebiku i Dziasiaciku.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?