Arhanizatary pieršamajskaha šeścia vyrašyli nie admaŭlacca ad papiaredniaha planu j buduć źbirać udzielnikaŭ akcyi kala budynku Akademii navuk ab 11.30, zajaviŭ sakratar CK Partyi kamunistaŭ Biełaruskaj Valer Uchnaloŭ. «Adtul pojdziem na Banhałor, tam a pałovie pieršaj adbudziecca mitynh z udziełam tvorčych kalektyvaŭ».
V.Uchnaloŭ dadaŭ, što pradstaŭniki inšych palityčnych partyjaŭ paćvierdzili svoj namier pryniać udzieł u akcyi 1 traŭnia.
«Asnoŭny lozunh budzie — salidarnaść u baraćbie za svaje pravy, za svabodu, za admienu prymusovaj kantraktnaj systemy. Salidarnaść z palitviaźniami, jakija znachodziacca za kratami, jakija aryštavanyja j čakajuć sudu. Salidarnaść z našymi ahulnymi idejałami, za demakratyju i pravy čałavieka».
Na pieršamajskim kancercie vystupiać «Čyrvonym pa biełym», «Tavaryš Maŭzer», «Krama», «Plan», Kasia Kamockaja i Andrej Chadanovič.
Kasia Kamockaja kaža, što dla jaje heta redkaja mahčymaść vystupić pierad biełaruskimi słuchačami. «Kancerty zabaronienyja užo na praciahu dziesiaci hadoŭ. Tamu vykarystoŭvajecca lubaja mahčymaść, navat 1 traŭnia».
Paśla zakančeńnia mitynhu na płoščy Banhałor adbudziecca ŭstanoŭčy schod inicyjatyŭnaj hrupy pa źmianieńni zakanadaŭstva ŭ častcy admieny prymusovaj kantraktnaj systemy. Da hetaj inicyjatyvy zmoža dałučycca kožny z udzielnikaŭ akcyi. Arhanizatary ličać, što ŭ inicyjatyŭnuju hrupu ŭvojduć da 500 čałaviek. Zhodna z zakanadaŭstvam, ciaham miesiaca im treba naźbirać 50 tys. podpisaŭ.
