Kamitetu dziaržaŭnaj biaśpieki Biełarusi ničoha nie viadoma ab masavym rasstrele pradstaŭnikoŭ biełaruskaj intelihiencyi ŭ noč na 30 kastryčnika 1937 hoda. Pra heta havorycca ŭ liście kiraŭnika KDB sustaršyniam hramadskaha arhkamiteta pa ŭviekaviečańni pamiaci achviar represij pieryjadu stalinizmu, paviedamiŭ BiełaPAN sakratar arhkamiteta Uładzimir Ramanoŭski.
Pavodle jaho słoŭ, list byŭ atrymany ŭ adkaz na zapyt, nakiravany ŭ KDB 16 krasavika, za podpisami sustaršyniaŭ kamiteta Radzima Hareckaha, Uładzimira Kołasa i Vasila Jakavienki ab vyjaśnieńni miescaŭ pachavańnia 69 pradstaŭnikoŭ biełaruskaj intelihiencyi, rasstralanych supracoŭnikami NKUS u noč na 30 kastryčnika 1937 hoda. Anałahičny zapyt byŭ taksama nakiravany ŭ MUS Biełarusi.
Daśledčyk temy stalinskich represij Ihar Kuźniacoŭ paviedamiŭ BiełaPAN, što 18 maja jamu patelefanavaŭ supracoŭnik Ministerstva ŭnutranych spraŭ Uładzimir Antonaŭ, jaki prapanavaŭ vysłać śpis represavanych na ruskaj movie, tamu što ŭ MUS adsutničajuć mahčymaści dla pierakładu biełaruskamoŭnaha śpisu. "Pakolki, pavodle słoŭ U.Antonava, ministerstva nie maje źviestak pra achviary, płanujecca nakiravać śpis u adpaviednyja rasijskija struktury. Adnak rasijskija archivy mohuć mieć tolki śpisy rasstralanych, ale nie źviestki pra ich pachavańni. Pakolki ŭsia infarmacyja takoha kštałtu znachodzicca ŭ archivie KDB Biełarusi, ajčynnamu MUS varta było b nakiravać zapyt u hetaje viedamstva", - ličyć vučony.
