Hramadskaść Vilejki (Minskaja vobłaść) vydała zbornik paezii biełaruskaha paeta i hramadskaha dziejača Siarhieja Zakońnikava «Heta my».
U knihu ŭvajšli paemy S.Zakońnikava «Čornaja byl», «Civali» i «Ziaziula», napisanyja ŭ 1988‑1995 hadach, a taksama faksimile listoŭ narodnaha piśmieńnika Biełarusi Vasila Bykava aŭtaru. Kali «Čornaja byl» pryśviečana čarnobylskaj trahiedyi, «Ziaziula» — V.Bykavu, to «Civali» — trahiedyi biełaruskaha naroda ŭ pieryjad stalinizmu.
U intervju BiełaPAN paet paviedamiŭ, što ŭ pačatku 1990‑ch hadoŭ jamu stała viadoma ab trahiedyi, jakaja adbyłasia ŭ vioscy Civali, što ciapier uvachodzić u rysu Minska (rajon kinateatra «Aŭrora» na vulicy Prytyckaha. — BiełaPAN.). Pavodle jaho słoŭ, u 1938 hodzie pa zahadzie stalinskaha narkama puciej znosinaŭ Łazara Kahanoviča «za sabataž» — admovu adpraŭlać ešałony represavanych u Sibir i Zapalarje — byli rasstralany kala 300 biełaruskich čyhunačnikaŭ z roznych haradoŭ. Kab utaić złačynstva, ich cieły byli zakapany ŭ žyviołamohilniku ŭ Civali. Pa sanitarnych normach, takija mohilniki nielha raskopvać na praciahu 100 hadoŭ. Adnak u 1960‑ia hady ŭ suviazi z pašyreńniem stalicy ŭ rajonie Civali pačałosia budaŭnictva i mohilnik płanavałasia źniščyć. Vajennasłužačyja Biełaruskaha pałka ŭskryli mohilnik i siarod kaściej žyvioł znajšli prastrelenyja čerapy ludziej i ich astanki, skručanyja kalučym drotam. Pa zahadzie źvierchu astanki ludziej i žyvioł byli spaleny napałmam i pachavany ŭ lesie kala darohi na Rakaŭ. «Pra heta ja i napisaŭ u svajoj paemie, pierakładzienaj na mnohija zamiežnyja movy», — skazaŭ paet.
Łaŭreat Dziaržaŭnaj premii Biełarusi imia Janki Kupały i šerahu mižnarodnych premij S.Zakońnikaŭ źjaŭlajecca aŭtaram 15 knih paezii, ese, publicystyki i narysaŭ. Asobnyja jaho knihi vydadzieny ŭ Maskvie, Varšavie i Safii. Mnohija vieršy pierakładzieny na zamiežnyja movy. Litaratar pierakłaŭ na biełaruskuju movu tvory paetaŭ Ukrainy, Bałharyi, Hiermanii, Polščy, Litvy. Uznaharodžany miedalom «Za ratavańnie tapielcaŭ na vadzie» (1960) i ordenam «Znak pašany» (1984).