Jarasłaŭ Łukasik pryznajecca, što zaŭždy mieŭ santyment da Biełarusi. Kali žyŭ jašče na Padlaššy, čaściakom vybiraŭsia ŭ naš kraj. Asabliva vabiła Narač. Tam letam 1994 hodu, u kaściole, Jarasłaŭ paznajomiŭsia z Natallaj i vyrašyŭ zastacca. Ciapier u ich dva syny i dačka. Usio ŭ hetaj siamji išło dobra, pakul Łukasika nia vyklikali ŭ adździeł unutranych spravaŭ Miadzielskaha rajvykankama. Jamu, jak hramadzianinu Polščy, zahadali pakinuć Biełaruś da 7 červienia, anulavaŭšy dazvoł na pastajannaje pražyvańnie.

NN: Jakija pretenzii da vas?

JAŁ: Padstavy davoli ćmianyja. Hruntujucca vyklučna na zapiskach KDB. Mnie pakazali ŭ pašpartnym adździele ŭ Miadzieli faks, jaki pryjšoŭ kankretna z hetaj struktury. Tam byli pieraličany asnoŭnyja pretenzii da mianie. Pa-pieršaje, mnie zakinuli toje, što ja «zajmaŭsia nielehalnaj dziejnaściu ŭ pratestanckich hramadach», druhoje — «ŭdzielničaŭ u nielehalnych schodach radykalna nastrojenych palityzavanych hrupovak», a pa-treciaje, što žyŭ nia tam, dzie byŭ prapisany.

NN: Što pa-vašamu mahło vyklikać takuju reakcyju?

JAŁ: Nia viedaju, što mahło tak razzłavać. Ja nikoli nie chavaŭ svajoj viery, taho, što ja evanhielski chryścijanin. Dzialiŭsia svaimi viedami z achvočymi datyčna historyi hetaha rehijonu. Nia byŭ pastyram, prosta słužyŭ, prapaviedvaŭ — voś i ŭsia maja dziejnaść. Što da ŭdziełu ŭ niejkich «hrupoŭkach», to zusim nie mahu patłumačyć adkul heta ŭziałosia. Jość u mianie šmat znajomych, jakija majuć svoj pohlad na biełaruskuju sytuacyju. Choć by maja žonka, jakaja źjaŭlajecca sapraŭdnaj biełaruskaj patryjotkaj. Jana molicca za Biełaruś, kab tut było ŭsio dobra, dziaciej my vychoŭvajem u biełaruskaj movie. Chiba heta złačynstva?

NN: Što vy planujecie rabić u hetaj suviazi, što budzie z vašaj siamjoj?

JAŁ: Budziem sudzicca — adpaviednyja dakumenty padali ŭ Miadzielski sud, bo heta rašeńnie parušaje pravy majoj siamji i maich dziaciej. Ułady vymušajuć pakinuć ich svaju radzimu. Vyhladaje na viartańnie hłybokaj savietčyny. Budziem zmahacca da apošniaha.

NN: Kali sprava składziecca nie na vašu karyść, što tady?

JAŁ: Ja šakavany hetaj sytuacyi, tamu hatovych scenaroŭ dalejšych dziejańniaŭ nie maju. Dumaju, što ja nievypadkova źviazaŭ svajo žyćcio ź Biełaruśsiu. I maje adnosiny da hetaj krainy zastanucca niaźmiennymi. Vieru, što ŭ nas budzie mahčymaść viarnucca siudy, navat kali nas vydalać.

Hutaryŭ Siarhiej Budkin

Na 22.05 29 śviataroŭ pastavili svaje podpisy pad zvarotam u Departament pa hramadzianstvu i mihracyi MUS RB i ŭ Administracyju prezydenta z prośbaj admianić rašeńnie ab anulavańni dazvołu na pastajannaje pražyvańnie na terytoryi Biełarusi Jarasłavu Łukasiku.

Клас
Панылы сорам
Ха-ха
Ого
Сумна
Абуральна