Buš u interviju "Rojterz" vystupiŭ ź biesprecedentna rezkaj krytykaj palityki Pucina. Pierad hetym u Samary z treskam pravaliŭsia samit Rasieja — Eŭraźviaz. Trochi raniej niaŭdačaj skončyŭsia vajaž u Maskvu Kandalizy Rajs. A na 9 traŭnia Pucin faktyčna pravioŭ paralel miž ZŠA i trecim rajcham.
Što heta, preludyja da novaj chałodnaj vajny? I ci vyjhraje ad hetaha trendu aficyjny Miensk?
Dyk voś, amerykanski prezydent vykazaŭ sumnieŭ, što siabar Uładzimier viadzie krainu ŭ bok demakratyi. Stasunki Rasiei z Zachadam Buš biez ekivokaŭ nazvaŭ napružanymi. A siarod inšaha — vo na jaki ŭzrovień pytańnie vyjšła! — zakinuŭ Maskvie i dyskryminacyju polskaha miasa.
Dałosia ŭ znaki hetaje miasa! Farmalna praź jaho atrymaŭsia biezvynikovym i samit u Samary. Varšava, jakuju strašenna pakryŭdziła embarha, na znak pomsty blakuje zaklučeńnie novaj damovy pamiž Rasiejaj i Eŭraźviazam.
Miž inšym, Polščy jość za što zmahacca. Raniej jana pradavała ŭ Rasieju miasa na 350 miljonaŭ eŭra za hod (pryładna stolki kaštujuć handlovyja preferencyi Eŭraźviazu dla Biełarusi). Maskva zakinuła palakam toje, što jany honiać pad vyhladam svajho praduktu ci nie indyjskuju bujvalacinu.
Chacia miasa, nibyta nie adpaviednaje sanitarnym normam, — tolki padstava. Tut ŭ Maskvy niastraŭnaść inšaha kštałtu. U pryvatnaści, Kreml raźjušyła rola Varšavy ŭ pamarančavaj revalucyi na Ŭkrainie. I rola Vilni taksama, darečy. Ci vypadkova pierasochła nieŭzabavie truba "Družby" ŭ kirunku Mažejkiajskaha NPZ?
Karaciej kažučy, Kreml nia moža źmirycca, što kolišnija krainy saclahieru i navat byłyja "małodšyja siostry" nia tolki vypali sa sfery ŭpłyvu, ale i pakazvajuć palityčny noraŭ. Kasa na kamień. Asabliva kryŭdna, što sa staroj Eŭropaj z abliččam a-la Šroder amal što było parazumielisia, hiešefty ładzić pačali, a tut, chalera ich biary, vyleźli niejkija palaki ź letuvisami! Zrešty, i estoncy z transferam bronzavaha žaŭniera rasstaralisia...
Ad šerahu analitykaŭ možna pačuć: rasiejskija viarchi naŭmysna raskručvajuć antyzachodnija nastroi pierad chutkimi vybarami Dumy i prezydenta. Na tle kanfrantacyi lahčej adkidać pretenzii Zachadu da "kiravanaj demakratyi" kramloŭskaha raźlivu.
Mienski palitolah Andrej Fiodaraŭ schilny hladzieć na kaliziju šyrej. Reč nia stolki ŭ pieradvybarnych hulniach, kolki ŭ pahłybleńni kaštoŭnasnaha kanfliktu miž ciapierašnim rasiejskim režymam dy zachodniaj demakratyčnaj supolnaściu, ličyć naš ekspert (darečy, pra toje samaje kažuć i asobnyja rasiejskija ahladalniki).
Biełaruskija dziaržaŭnyja medyi kamentujuć niaŭdały vajaž Rajs dy pravał samitu ŭ Samary z kiepska prychavanaj złaradnaściu. I reč tut nia tolki ŭ prapahandysckich stereatypach. "Paŭnamaštabnaj chałodnaj vajny nia budzie. Adnak hetaje zaŭvažnaje pachaładańnie — na karyść biełaruskamu režymu, — ličyć Andrej Fiodaraŭ. — Maskva pastarajecca pryciahnuć bližej reštu chaŭruśnikaŭ. A zrabić heta možna za košt niejkich preferencyjaŭ. Ź inšaha boku, i Zachad u takich varunkach budzie zaścierahacca nadta cisnuć na biełaruskuju ŭładu, kab jana dziela paratunku nia kinułasia ŭ abdymki Rasiei".
Dramatyzm momantu dla našaj krainy u tym, što abjektyŭna zaraz uzmacnilisia akurat čyńniki zbližeńnia z Eŭropaj. Maskva sama, kali chočacie, tudy Biełaruś padšturchoŭvaje! Chacia b taki štrych: praz dyskryminacyju polskaha miasa zatavarylisia i našyja miasakambinaty, nie atestavanyja hroznymi rasiejskimi praviaralnikami. U našych intaresach, kab nafta i haz išli z Azii ŭ Eŭropu ŭ abychod Rasiei (chacia ajčynnaja prapahanda biazhłuzda radujecca tamu, što vysiłkami Kramla byŭ skamiečany enerhietyčny samit u Krakavie). Chiba my nia źviedali, što takoje naftahazavy šantaž, jakoha tak baicca Eŭraźviaz?
"Kali b va ŭłady było ščyraje imknieńnie da zbližeńnia z Eŭropaj, Biełaruś vielmi chutka atrymała b ad Bruselu nia tolki maralnuju padtrymku", — upeŭnieny Fiodaraŭ.
Adnak šlach u Eŭropu blakujecca mentalnaściu siońniašniaj ułady. Zachodnija kaštoŭnaści jak u Maskvie, tak i ŭ Miensku vyklikajuć idealahičnuju niastraŭnaść. Zatoje chto-kolviek tut paciraje ruki, kali Rajs fihuralna bjecca hałavoj ab kramloŭskuju ścianu, Buš svarycca na Pucina, a na samicie ŭ Samary rasiejski prezydent skubiecca z Merkel. I kali "pucinskija chunvejbiny" paśla abłohi estonskaj ambasady u Maskvie pieraklučajucca na pradstaŭnictva Eŭrakamisii.
