Siońnia Pałata pradstaŭnikoŭ maje razhledzieć u dvuch čytańniach prajekt zakonu «Ab dziaržaŭnych sacyjalnych ilhotach, pravoch i harantyjach dla paasobnych katehoryjaŭ hramadzianaŭ».
Na praciahu apošniaha tydnia moładzievyja aktyvisty praviali šerah pikietaŭ, razdali studentam ulotki z zaklikam vyjści na płošču pierad budynkam Domu ŭradu, kali deputaty buduć prymać zakon ab skasavańni lhotaŭ. Aktyvisty raźličvajuć, što da ich dałučacca sotni hramadzianaŭ.
Kaardynatar niezarehistravanaj arhanizacyi «Novy šlach» Andrej Sprynžuk paviedamiŭ «Svabodzie», što da akcyi dałučacca aktyvisty inšych moładzievych arhanizacyjaŭ. Arhanizatary ličać, što na płošču pryjduć i studenty ź niekatorych universytetaŭ. Andrej Sprynžuk nie vyklučaje, što da akcyi mohuć dałučycca invalidy i likvidatary nastupstvaŭ katastrofy na Čarnobylskaj AES:
«My raspaŭsiudzili paŭtary tysiačy ŭlotak z zaklikam pryjści 23 traŭnia a 12‑j hadzinie na płošču Niezaležnaści da budynku Pałaty pradstaŭnikoŭ, kab vykazać svajo staŭleńnie da zakonu, jaki jany planujuć pryniać. Kali my razdavali ŭlotki, ludzi stanoŭča reahavali na heta. Na žal, heta ŭsio nie było padtrymana vialikimi palityčnymi partyjami. Usio robicca tolki namahańniami niekalkich moładzievych arhanizacyjaŭ. Ale my raźličvajem, što ludzi buduć, što buduć studenty, bo heta datyčycca kožnaha ź ich».
Vital Sarokin spadziajecca, što ŭłady ŭstrymajucca ad masavych zatrymańniaŭ u centry horadu, kab prademanstravać lajalnaść da prajavaŭ inšadumstva:
«My dumajem, što milicyja budzie pracavać va ŭzmocnienym režymie. Mahčyma, płošča budzie pierakrytaja, bo rezanans hetaj padziei ŭžo adčuvajecca i siarod studenctva, i invalidaŭ, i čarnobylcaŭ, jakim źbirajucca admianić ilhoty. Spadziajemsia, što masavych zatrymańniaŭ nia budzie. Budziem stajać na płoščy, kab nas zaŭvažyli, kab deputaty i hramadztva viedali, što jość ludzi, jakija mohuć abaranić svaje pravy i svabody».
Paśla vychadu dekretu № 5 ad 10 sakavika 1997 hodu i šerahu inšych ukazaŭ Alaksandra Łukašenki schody i mitynhi na płoščy Niezaležnaści byli zabaronienyja. Ludziam nie davali sabracca na płoščy ŭ Dzień Voli i na «Čarnobylski šlach». Potym na płoščy Niezaležnaści pačałasia rekanstrukcyja, jakaja doŭžyłasia niekalki hadoŭ. Šmatlikija padziemnyja pierachody da handlovych šapikaŭ i klumby padzialili płošču — miesca zboru prychilnikaŭ pieramienaŭ ad času pierabudovy — na maleńkija placoŭki.
Arhanizatary siońniašniaj akcyi raźličvajuć, što ŭsim, chto zachoča paŭdzielničać u mierapryjemstvie, chopić miesca na placoŭcy pierad Domam uradu.
