Budaŭniki častkova demantavali budynak paravoha młyna, jaki źjaŭlajecca ŭzoram pramysłovaj eklektyki. Takich zbudavańniaŭ u Horadni ŭsiaho dva.
Pra razbureńnie młyna na vuł. Vasilka naprykancy pracoŭnaha dnia paviedamiŭ miascovy žychar, jaki daviedaŭsia pra abaroncaŭ Horadni z ulotki.
Pavodle słovaŭ adnaho ź inicyjataraŭ praviadzieńnia haradzkoha referendumu žurnalista Alesia Zaleŭskaha, za 15 chvilinaŭ na miesca rujnavańnia źviłasia kala dziasiataka čałaviek. Z saboj jany mieli raściažku «Nie hubicie Horadniu». Budaŭniki na pytańnie, što jany źbirajucca tut rabić, adkazali: «Budziem valić młyn, jak nam i zahadali». Na toj momant kala traciny budynku ŭžo było razburana. Potym pracoŭny dzień skončyŭsia i budaŭničuju techniku ad budynku młyna adahnali. Abaroncy horadu abiacajuć praciahvać vachtu pobač z budynkami, zaplanavanymi pad znos.
Haradzienski historyk Janka Lalevič raspavioŭ pra novuju achviaru rekanstrukcyi. Paravy młyn na Vasilka byŭ abudavany naprykancy XIX st. — vierahodna ŭ peryjad ad 1890 pa 1916 hh. Młyn ŭjaŭlaje saboju charakterny ŭzor pramysłovaj eklektyki. Budynak vyšynoju kala 5 pavierchaŭ. Akramia jaho ŭ Horadni jość jašče adzin padobny budynak na vuł. Budzionnaha.
Krajaznaviec Ihar Łapiecha kaža, što ŭładam udałosia padmanuć hramadztva praz aficyjnyja ŚMI, u jakich viałosia tolki pra rekanstrukcyju budynka.
Fota Julii Daraškievič