Daterminovaje vyzvaleńnie apazycyjnych palitykaŭ Paŭła Sieviarynca i Mikoły Statkieviča nie paŭpłyvaje na rašeńnie vyklučyć Biełaruś ź Hieneralnaj systemy preferencyj Eŭraźviazu.
Pra heta zajaviŭ Žan-Eryk Cholcapfel, kaardynatar pa suviaziach ź Biełaruśsiu pradstaŭnictva Eŭrakamisii va Ŭkrainie i Biełarusi.
Zajava była apublikavanaja ŭ časie onłajn kanferencyi, naładžanaj biełaruskim Internet-vydańniem naviny.by.
Dyplamat padkreśliŭ, što “mechanizm systemy preferencyj nijak nie źviazany z palityčnymi viaźniami, jon źviazany z abaronaj pravoŭ prafsajuzaŭ i vykanańniem umovaŭ Mižnarodnaj arhanizacyi pracy”.
Rašeńnie ab pazbaŭleńni Biełarusi handlovych preferencyj było pryniataje Eŭrakamisijaj letaś 20 śniežnia z adterminoŭkaj vykanańnia na 6 miesiacaŭ. Pierahlad hetaha rašeńnia moža adbycca tolki na padstavie novaj spravazdačy Mižnarodnaj arhanizacyi pracy, kali ŭ joj budzie adznačany prahres u Biełarusi ŭ pytańni vykanańnia pravoŭ prafsajuzaŭ. Hetaja spravazdača budzie pradstaŭlenaja ŭ červieni sioleta.
Spadar Cholcapfel admoviŭsia adkazvać na pytańnie, ci śviedčyć vyzvaleńnie palitviaźniaŭ, što Biełaruś robić krok nasustrač Eŭropie. Jon tolki nahadaŭ, što vyzvaleńnie ŭsich palitviaźniaŭ źjaŭlajecca adnym z klučavych patrabavańniaŭ Eŭraźviazu, jakija byli letaś ahučanyja ŭ dakumencie “Što Eŭraźviaz moža dać Biełarusi?”
