Kala dziasiatka maładzionaŭ pratestavali suprać razbureńnia paravoha młynu. Supracoŭniki milicyi zatrymali pikietoŭcaŭ z prymianieńniem hrubaj siły
Incydent adbyŭsia paśla taho, jak pratestoŭcy siońnia ŭvarvalisia va ŭnutrany dvor, što atačaje paravy młyn. Jany pasprabavali pieraškodzić razbureńniu budynka, ale apynulisia ŭ pastcy — bramu začynili i vyklikali milicyjantaŭ.
Supracoŭniki milicyi prybyli ŭ supravadžeńni Siarhieja Viečara, viadomaha ŭ Horadni milicyjanta, jaki kiruje preventyŭnymi zatrymańniami haradzienskich aktyvistaŭ. Byli taksama asoby ŭ cyvilnym dy aperatar.
Milicyjanty vysłuchali patrabavańni moładzi naładzić abjektyŭnaje i adkrytaje aśviatleńnie pytańniaŭ rekanstrukcyi horadu i losu paravoha młynu ŭ pryvatnaści. Taksama pikietoŭcy patrabavali sustrečy sa staršyniom haradzienskaha harvykankamu Alaksandram Antonienkam. Maładyja ludzi trymali raściažku «Nie hubitie Hrodno». Paśla hetaha ŭdzielnikaŭ pikietu dosyć žorstka zatrymali i advieźli ŭ Leninski RUUS. Fotakarespandentu «NN» Julii Daraškievič pry hetym pieraškadžali fatahrafavać. Milicyjanty nie pradstaŭlalisia, matyvujučy heta tym, što i tak usie znajomyja.
U RUUS advieźli 13 čałaviek. Pieršym na dopyt vyklikali Maksima Hubareviča, aktyvista Partyi BNF. Milicyjanty skazali, što jon «pojdzie na 15 sutak». Astatnim razdali arkušy ź pieralikam pravoŭ i abaviazkaŭ asobaŭ, jakija padviarhajucca administratyŭnamu pakarańniu. Praz hadzinu vosiem čałaviek pavieźli ŭ sud, astatnich adpuścili.
***
Haradzienski sud papiaredziŭ pikietoŭcaŭ
Piacioch čałaviek adpuścili biez sudu: niepaŭnahadovych, a taksama historyka Janku Laleviča. Apošniaha vyzvalili paśla taho, jak prahledzieli videazapis, zrobleny padčas akcyi milicejskim aperataram. Siem čałaviek atrymali papiaredžańnie. Maksim Hubarevič aštrafavany na 10 bazavych vieličyniaŭ (310 tys.bieł.rub.).
Moładź źvinavacili va ŭdziele ŭ niesankcyjanavanym pikiecie. Sudovaje pasiedžańnie pravodziŭ sudździa Maciajuk. Kali razhladałasia sprava žurnalista Alesia Zaleŭskaha, milicyjant‑śviedka pačaŭ nastojvać na bolš žorstkim pakarańni dla jaho, bo toj nibyta byŭ najbolš aktyŭnym arhanizataram apošnich akcyjaŭ. Na što sudździa adkazaŭ, što budzie kiravacca zapisam ŭ pratakole, a mienavita «udzieł u niesankcyjanavanym pikiecie».
Pres‑sakratar arhkamitetu ruchu «Za Svabodu» Pavał Mažejka miarkuje, što svaimi dziejańniami ŭłady pieraśledujuć niekalki metaŭ: adnaŭleńnie maštabnych rujnavańniaŭ «avaryjnych» kamianicaŭ, neŭtralizacyju najbolš aktyŭnych abaroncaŭ Horadni. «Amal adnačasova z młynom adnaviłasia «rekanstrukcyja» flihielu — ad jaho zastalisia tolki ścieny. Mahčyma, heta robicca, kab raściarušyć siły abaroncaŭ, spravakavać ich i neŭtralizavać», — miarkuje sp. Mažejka.
Aleś Zaleŭski paviedamiŭ, što mieŭ hutarku ź inžyneram, adkaznym za rujnavańnie młynu. Toj paviedamiŭ, što adkazvaje tolki za znos budynku i nia viedaje pra dalejšy los młyna.
