Dopis na Biełpartyzanie, padpisany Smanceram — jaskravy prykład impartu ŭ Biełaruś čornaha pijaru rasiejskaha raźlivu. Navat pabiežny analiz słovaŭ i vyrazaŭ pakazvaje na heta. Ale momant nie padhadany — hetyja vykazvańni cudoŭna dysanujuć z słovami padtrymki i pavahi ludziej, mužnaść i addanaść jakich biełaruskaj Spravie nie vyklikajuć sumnievaŭ, Mikoły Statkieviča i Paŭła Sieviarynca, Uładzimira Arłova i Valeryja Mazynskaha.
Pa sutnaści, lepšaj reklamy lideru praeŭrapiejskich biełarusaŭ i nia treba! Bo sam fakt źjaŭleńnia takoj «dezy» na sajcie prarasiejskaj tusoŭki — naŭprostavaje pryznańnie istotnaje pazytyŭnaje roli i patencyjała Alaksandra Milinkieviča ŭ palityčnym žyćci Biełarusi.
Taksama Varta źviarnuć uvahu, jak interpretujecca niezaležnickaja pazycyja Alaksandra Milinkieviča. Vykarystoŭvajecca ciapierašni typovy technalahičny truk rasiejcaŭ: pryviazka abarony niezaležnaści vyklučna da spravy prałukašenkaŭskaha lahieru.
Darečy, u dopisie daminuje ŭłaścivaje vielmi mnohim uschodnim i praŭschodnim analitykam hreblivaje staŭleńnie da biełaruskaj demakratyčnaj supolnaści: «słučajnyje ludi iz čiertovoj tabakierki», «niedostojnyje politiki‑vyskočki», «biezumnaja boŕba», «niečiestnyje i truślivyje ludi», «iniertnyje», «paśsivnyje», «skandalnyje», «mnimyje oppozicioniery» (a jość i realnyja — zdahadajciesia, chto!).
Z Maskvy biełaruskuju palityku i prabiełaruskich palitykaŭ chočuć bačyć mienavita takimi. Im nie patrebnaja niezaležnaja demakratyčnaja eŭrapiejskaja Biełaruś, jakaja patrebnaja samim biełarusam i jakuju paśpiachova ŭvasablaje Alaksandr Milinkievič, laŭreat premii im. vialikaha rasiejca Andreja Sacharava.
Što jašče možna znajści stanoŭčaha ŭ dadzienym dopisie, dyk heta schavanaje pasłańnie da ŭsich biełarusaŭ: demakratyja, eŭrapiejskija kaštoŭnaści i vybar Biełarusi nie pradajucca za «skolko‑nibud́ prijemlemuju cienu», a zmahacca z režymam treba nie dziela taho, kab «zarabatyvať dieńhi», a kab na padstavie kaštoŭnaściaŭ svabody, niezaležnaści i eŭrapiejskaha vybaru pabudavać lepšuju Biełaruś.
